കോവിഡ് മാനദണ്ഡങ്ങള് പാലിച്ചായിരുന്നു ഇത്തവണത്തെ വിനായക ചതുര്ത്ഥി വിശ്വാസികള് ആഘോഷിച്ചത്. വിനായകനെ ആരാധിക്കുന്നവര് അറിയേണ്ട ഒന്നാണ് ഗണപതിയെ കറന്സി നോട്ടില് അച്ചടിച്ച രാജ്യത്തെ കുറിച്ച്. കറന്സി നോട്ടില് ഗണപതിയെ അച്ചടിച്ച ഏക രാജ്യം ഇന്തോനേഷ്യയാണ്. ഇവിടുത്തെ 20,000 രൂപ നോട്ടിലാണ് ഗണപതിയുടെ ചിത്രം അച്ചടിച്ചിരുന്നത്.
പ്രശസ്ത ഇന്തോനേഷ്യന് സ്വാതന്ത്ര്യ പ്രവര്ത്തകനായ കി ഹജര് ദേവന്താരയുടെ ചിത്രത്തിന് സമീപമായാണ് കറന്സി നോട്ടില് ഗണപതിയുടെ ചിത്രവും ഉള്ളത്. ഇവിടെയുള്ള 87.2 ശതമാനം ആളുകളും മുസ്ലീംമത വിശ്വാസികളാണ്. 1.7 ശതമാനം ഹിന്ദുമത വിശ്വാസികള് മാത്രമാണ് ഇന്തോനേഷ്യയിലുള്ളൂ. പക്ഷെ ഇസ്ലാം മതവിശ്വാസികള് വരുന്നതിന് ആയിരക്കണക്കിന് വര്ഷങ്ങള്ക്ക് മുമ്പ് ഇന്തോനേഷ്യയില് ഹിന്ദുമതം വളരെ പ്രചാരത്തിലുണ്ടായിരുന്നതായി ചരിത്രക്കാരന്മാര് പറയുന്നു. കൂടാതെ നിരവധി പുരാതന ക്ഷേത്രങ്ങളും രാജ്യത്തുടനീളം ഇപ്പോഴും കാണാനാകും.
ഒന്നാം നൂറ്റാണ്ട് മുതല് ഇന്തോനേഷ്യ ഹിന്ദുമതത്തിന്റെ സ്വാധീനത്തിലായിരുന്നു. ഹിന്ദുമതത്തിന്റെ ചില വശങ്ങള് ഇന്തോനേഷ്യന് സംസ്കാരത്തെ ഇപ്പോഴും സ്വാധീനിക്കുന്നുണ്ട്. ഇതിന്റെ തെളിവാണ് ഗണപതിയെ അച്ചടിച്ചുള്ള ഈ കറന്സികള്. ഇസ്ലാം മതം കൂടാതെ പ്രൊട്ടസ്റ്റന്റ്, റോമന് കത്തോലിക്കാ, ഹിന്ദുമതം, ബുദ്ധമതം, കണ്ഫ്യൂഷ്യനിസം എന്നീ ആറ് മതങ്ങളാണ് ഇന്തോനേഷ്യന് സര്ക്കാര് ഔദ്യോഗികമായി അംഗീകരിച്ചിട്ടുള്ളത്.
