തിരുവനന്തപുരം: കെ.എസ്.ആര്.ടി.സി. ചെന്നൈയിലേക്ക് പുതിയ സര്വീസ് ആരംഭിച്ചാല് തമിഴ്നാട്ടില് എത്ര കിലോമീറ്റര് ഓടുന്നുവോ അത്രയും കിലോമീറ്റര് തമിഴ്നാട് സര്ക്കാര് ബസ് കേരളത്തിലൂടെ സര്വീസ് നടത്താന് അനുവദിക്കണമെന്ന് കെ.എസ്.ആര്.ടി.സി. എം.ഡി. ബിജു പ്രഭാകര്. പാലക്കാട്ടുനിന്ന് ചെന്നൈവരെ എത്താന് ദീര്ഘദൂരം തമിഴ്നാട്ടിലൂടെ പോകണം. ഇത്രയുംദൂരം തമിഴ്നാട് ബസ് കേരളത്തില് സര്വീസ് നടത്താന് അനുവദിക്കുന്നത് കെ.എസ്.ആര്.ടി.സി.യുടെ സര്വീസുകളെ ബാധിക്കും. ഇങ്ങനെ ഒരു പ്രശ്നമുണ്ടെങ്കിലും ചെന്നൈയിലെ മലയാളികളുടെ ആവശ്യം പരിഗണിച്ച് ഇവിടേക്ക് സര്വീസ് നടത്താന് തയ്യാറാണ്.
ദീര്ഘദൂര യാത്രയ്ക്ക് യോജിച്ച സ്ലീപ്പര്, സെമി സ്ലീപ്പര് ബസുകള് വേണം. കിഫ്ബിയുടെ സഹായത്തോടെ 25 വീതം സ്ലീപ്പര്, സെമി സ്ലീപ്പര് ബസുകള് ലഭിക്കുമെന്ന് കരുതുന്നു. അതുലഭിച്ചാല് ചെന്നൈ കൂടാതെ കൂടുതല് അന്തസ്സംസ്ഥാന സര്വീസുകള് നടത്താന് സാധിക്കും.
കെ.എസ്.ആര്.ടി.സി. ഇപ്പോള് താത്കാലിക സര്വീസ് പ്രഖ്യാപിച്ചത് അധികലാഭം ലക്ഷ്യമാക്കിയല്ല. സര്ക്കാര് ആവശ്യപ്പെട്ടത് അനുസരിച്ച് സര്വീസുകള് ആരംഭിക്കുകയായിരുന്നു. എന്നാല് ആളില്ലാതെ സര്വീസ് നടത്താന് സാധിക്കില്ല. 10-15 യാത്രക്കാരുമായി സര്വീസ് നടത്തുന്നത് വലിയ നഷ്ടമാണ്. താത്കാലിക സര്വീസിന് ആളില്ലാതെ വന്നപ്പോള് ഇതിനകം ബുക്ക് ചെയ്തവരെ ഫോണില് വിളിച്ച് യാത്രാ തീയതി മാറ്റിയാണ് ഈ മാസം 27, 28 തീയതികളില് സര്വീസ് നടത്തുന്നത്. യാത്രക്കാര് ഇക്കാര്യത്തില് സഹകരിക്കാന് തയ്യാറായി. യാത്രക്കാരില്ലെങ്കില് സര്വീസ് റദ്ദാക്കേണ്ടി വരുമെന്ന് നേരത്തേത്തന്നെ പറഞ്ഞിരുന്നു. യാത്രക്കാരില്ലെങ്കില് ഒന്നാം തീയതി മുതലുള്ള സര്വീസുകളും നടത്താന് സാധിക്കില്ല.
30 പേരെങ്കിലുമില്ലാതെ സര്വീസ് നടത്താന് സാധിക്കില്ല. ബെംഗളൂരു സര്വീസുകളില്നിന്ന് ഒരു കിലോ മീറ്ററിന് 4555 രൂപ വരെ വരുമാനം ലഭിക്കുന്നുണ്ട്. യാത്രാ സര്വീസിനൊപ്പം പാഴ്സല് സര്വീസ് സാധിക്കില്ല. അതിനായി പ്രത്യേക സര്വീസുകള് നടത്തണം. യാത്രക്കാരില് നിന്ന് ടിക്കറ്റ് ചാര്ജ് ഇനത്തില് ലഭിക്കുന്ന പണംകൊണ്ട് യാത്രാ സര്വീസുകള് നടത്താന് കഴിയണം.
സ്വകാര്യ സര്വീസിനെക്കാള് മികച്ച രീതിയില് കെ.എസ്.ആര്.ടി.സി.ക്ക് സര്വീസ് നടത്താന് സാധിക്കും. സമയക്രമം പാലിച്ച് സര്വീസ് നടത്തുന്നതില് വിട്ടുവീഴ്ചയുണ്ടാകില്ല. നോണ്സ്റ്റോപ്പ് ബസുകള് ബൈപാസ് മാര്ഗത്തില് പോകുന്നതിന് നിര്ദേശം നല്കിയിട്ടുണ്ടെന്നും അദ്ദേഹം പറഞ്ഞു.
