സംഗീത സംവിധായകനിൽ നിന്ന് മരപ്പണിയിലേക്ക്: ഇത് ഔസേപ്പച്ചന്റെ കൊവിഡ് കാല ടൈം പാസ്

ഒത്തിരിയൊത്തിരി മനോഹര ഗാനങ്ങള്‍ ഒരുക്കിയ സംഗീതാസ്വാദകര്‍ക്ക് ഏറെ പ്രിയപ്പെട്ട സംഗീതസംവിധായകനും വയലിനിസ്റ്റുമാണ് ഔസേപ്പച്ചൻ. എന്നാലിപ്പോള്‍ സംഗീതം വിട്ട് മറ്റൊരു മേഖലയിലേക്ക് തന്‍റെ ശ്രദ്ധ പതിപ്പിച്ചിരിക്കുകയാണ് അദ്ദേഹം. കൊവിഡ് കാലത്ത് വീട്ടിൽ ഇരുന്നപ്പോള്‍ അദ്ദേഹം തീര്‍ത്ത മേശയും കുരിശും അടുക്കളയിലേക്കുള്ള തട്ട്പലകയും ഷെൽഫുമൊക്കെ ശ്രദ്ധ നേടിയിരിക്കുകയാണിപ്പോള്‍. അദ്ദേഹം തന്നെയാണ് ഫേസ്ബുക്കിലൂടെ മരപ്പണിയുടെ വീഡിയോ പങ്കുവെച്ചിരിക്കുന്നത്.

നമ്മുടെ ജീവിതത്തിൽ നമ്മുടെ മനസ്സും ശരീരവും മോശമാകുന്നത് വെറുതെ സമയം കളയുന്നത് കൊണ്ടാണ്. ഈ കൊറോണ കാലത്ത് ഇത്തരം സാഹചര്യത്തിൽ നമ്മൾ എത്തിപ്പെട്ടിട്ടുണ്ട്. എന്നാൽ ഈ സാഹചര്യത്തെ നമുക്ക് തന്നെ അതിജീവിക്കാം. ഇതിനു വേണ്ടി ഞാൻ നടത്തിയ ഒരു ശ്രമം ആണ് ഇത് എന്ന് കുറിച്ചുകൊണ്ടാണ് അദ്ദേഹം തന്‍റെ ഫേസ്ബുക്ക് പേജിൽ മരപ്പണി വീഡിയോ പങ്കുവെച്ചിരിക്കുന്നത്.

ഇതിൽ നിന്നും സാമ്പത്തിക നേട്ടം ഒന്നും ഇല്ല, എങ്കിലും മാനസികമായി ഒരുപാട് സന്തോഷം നൽകുന്നു, ഇത്തരം കഠിനമായ ജോലി ചെയ്താൽ വയലിൻ വായിക്കുവാൻ പ്രയാസം ആകില്ലേ എന്ന ആശങ്ക എന്‍റെ കുടുംബം പങ്കുവെച്ചിരുന്നു. എന്നാൽ ഇത് പൂർത്തിയാക്കിയപ്പോൾ എനിക്ക് കൂടുതൽ കരുത്തോടെ വയലിൻ വായിക്കാൻ കഴിയും എന്ന ആത്മവിശ്വാസം ആണ് തോന്നിയത്. നിങ്ങൾ എല്ലാപേർക്കും ഈ വീഡിയോ പ്രചോദനം ആകും എന്ന് ഞാൻ കരുതുന്നു, നിങ്ങളുടെ സ്വന്തം ഔസേപ്പച്ചൻ, അദ്ദേഹം കുറിപ്പ് അവസാനിപ്പിച്ചിരിക്കുന്നത് ഇങ്ങനെയാണ്.

തൃശ്ശൂര്‍ കിഴക്കുംപാട്ടുകരയിലാണ് മേച്ചേരില്‍ എന്ന അദ്ദേഹത്തിന്‍റെ വീട്. വീട്ടിലെ മരപ്പണിശാലയിൽ ഇരുന്നുകൊണ്ട് തടി ഉരുപ്പടികള്‍ ഉണ്ടാക്കുന്നതിന്‍റെ ചെറിയൊരു വീഡിയോയും കുറിപ്പിനൊപ്പം അദ്ദേഹം പങ്കുവെച്ചിട്ടുണ്ട്. നിരവധി കമന്‍റുകളാണ് അദ്ദേഹത്തിന്‍റെ വീഡിയോയ്ക്ക് താഴെ വന്നുകൊണ്ടിരിക്കുന്നത്.