ദുബായ് : ക്രിക്കറ്റ് ലോകം ഐപിഎല്ലിന്റെ ആവേശത്തിലേക്ക് ഉണരാന് ഇനി ദിവസങ്ങള് മാത്രമേയുള്ളു. ഈ മാസം 19 മുതല് നവംബര് 10 വരെ യുഎഇയിലാണ് പോരാട്ടങ്ങള്. ടീമുകളെല്ലാം അതിന്റെ തയ്യാറെടുപ്പിലാണ്.
അതിനിടെ റോയല് ചലഞ്ചേഴ്സ് ബാംഗ്ലൂരിന്റെ ആരാധകനായ വ്യക്തിയുടെ ട്വിറ്റര് പോസ്റ്റും അതിന് രാജസ്ഥാന് റോയല്സ് നല്കിയ രസകരമായ മറുപടിയും ശ്രദ്ധേയമാകുകയാണ്. രാജസ്ഥാന് റോയല്സിന്റെ ഇംഗ്ലീഷ് ബാറ്റ്സ്മാന് ജോസ് ബട്ലറെ റോയല് ചലഞ്ചേഴ്സിന് വിട്ടു തരണം എന്നാണ് ആരാധകന്റെ ആവശ്യം. ഐപിഎല്ലില് ഇതുവരെ കിരീടം നേടാന് സാധിക്കാത്ത ടീമാണ് ആര്സിബി. കോഹ്ലി നായകനായ ടീമില് ഡിവില്ല്യേഴ്സ് അടക്കമുള്ള ലോകോത്തര ബാറ്റ്സ്മാന്മാര് ഉണ്ടായിട്ടും അവര്ക്ക് കിരീടം കിട്ടാക്കനിയായി നില്ക്കുന്നു.
കഴിഞ്ഞ ദിവസം ഓസ്ട്രേലിയക്കെതിരായ രണ്ടാം ടി20 പോരാട്ടത്തില് ഇംഗ്ലണ്ടിനെ വിജയിപ്പിച്ചത് ബട്ലറുടെ ഉജ്ജ്വല ബാറ്റിങ്ങായിരുന്നു. 54 പന്തില് എട്ട് ഫോറും രണ്ട് സിക്സും സഹിതം 77 റണ്സാണ് ബട്ലര് അടിച്ചെടുത്തത്. ആദ്യ മത്സരത്തിലും താരം മികച്ച ഫോമിലായിരുന്നു. ഒന്നാം ടി20യില് 29 പന്തില് 44 റണ്സാണ് ബട്ലര് അടിച്ചെടുത്തത്. താരത്തിന്റെ മിന്നും ഫോം രാജസ്ഥാന് റോയല്സിന് വലിയ പ്രതീക്ഷയാണ് നല്കുന്നത്.
അതിനിടെയാണ് ആര്സിബി ആരാധകന് പരസ്യമായി ബട്ലറെ തന്റെ ഇഷ്ട ടീമിന് വിട്ടുനല്കണമെന്ന ആവശ്യവുമായി എത്തിയത്. ഇതിനാണ് രാജസ്ഥാന് ടീം രസകരമായ മറുപടി നല്കിയിരിക്കുന്നത്.
അക്ഷയ് എന്ന് പേരുള്ള ട്വിറ്റര് ഹാന്ഡിലില് നിന്നാണ് ചോദ്യം വന്നത്. 'രാജസ്ഥാന് റോയല്സ്, ഞാന് നിങ്ങളോട് വീണ്ടും ചോദിക്കുന്നു ജോസ് ബട്ലറെ ആര്സിബിക്ക് നല്കാന് ഞാന് എന്തു ചെയ്യണം'?
'നിങ്ങളോട് ഞങ്ങള്ക്ക് ഇതാണ് പറയാനുള്ളത്..... അക്കാര്യത്തെ കുറിച്ച് ചിന്തിക്കണ്ട. നിങ്ങളെ സഹായിക്കാന് കഴിയില്ല'- എന്നായിരുന്നു രാജസ്ഥാന് റോയല്സിന്റെ മറുപടി. ബോളിവുഡ് ഇതിഹാസം അമിതാഭ് ബച്ചന് തൊഴുത് നില്ക്കുന്ന ചിത്രത്തോടൊപ്പമാണ് രാജസ്ഥാന്റെ രസകരമായ മറുപടി.
Aap chahe toh quit kar sakte hain 😅🙏 https://t.co/chphKJulZC pic.twitter.com/kuSnKz8R1g
— Rajasthan Royals (@rajasthanroyals) September 6, 2020
