ട്രാന്സ്ജെന്ഡര് ആയതു കൊണ്ട് സമൂഹത്തില് നേരിടേണ്ടി വന്ന അവഗണനകളെ കുറിച്ച് നിരവധി പേര് തുറന്നു പറഞ്ഞിട്ടുണ്ട്. ഇതില് നിന്നൊക്കെ വ്യത്യസ്തമായി തന്റെ മനസ് ഒരു പെണ്ണിന്റെയാണെന്ന് പറഞ്ഞപ്പോള് മാതാപിതാക്കള് അതിനെ അംഗീകരിച്ചതിനെ കുറിച്ച് തുറന്നു പറയുകയാണ് ഒരു ട്രാന്സ്ജെന്ഡര് യുവതി. ഹ്യൂമന്സ് ഓഫ് മുംബൈ എന്ന പേജിലൂടെയാണ് അനുഭവം പങ്കുവച്ചത്.
'' അഞ്ചു വയസ്സുള്ളപ്പോഴാണ് ഞാനും കസിനും ചേര്ന്ന് കുച് കുച് ഹോത്താഹേ സിനിമ കാണുന്നത്. അപ്പോള് എനിക്ക് ഷാരുഖ് ഖാനെ വിവാഹം കഴിക്കണമെന്ന് ഞാന് പറഞ്ഞു. സഹോദരിക്ക് ബാര്ബിയും എനിക്ക് കാറുകളും കളിപ്പാട്ടം സമ്മാനമായി ലഭിക്കുമ്പോള് ഞാന് അവളുടെ ബാര്ബി മോഷ്ടിച്ചെടുത്ത് കളിക്കുമായിരുന്നു. എന്നാല്, അപ്പോഴൊന്നും എന്റെ അമ്മയും അച്ഛനും അത് തടഞ്ഞിട്ടില്ല. എനിക്ക് പാവക്കുട്ടികളും ഉടുപ്പുമെല്ലാമാണ് ഇഷ്ടമെന്ന് അറിഞ്ഞപ്പോള് അവര് അതെല്ലാം കൂടുതല് വാങ്ങിത്തന്നു.
ഞാന് പെണ്കുട്ടിയെ പോലെയാണെന്ന് പറഞ്ഞ് പലരും കളിയാക്കുമായിരുന്നു. ഒരിക്കല് ഈ കളിയാക്കല് അസഹനീയമായി. ആണ്കുട്ടികള് എന്നെ സ്പര്ശിക്കാനും ഉമ്മവയ്ക്കാനുമൊക്കെ ശ്രമിച്ചു. ഞാന് വീട്ടിലെത്തി മാതാപിതാക്കളോട് ഇതേകുറിച്ച് പറഞ്ഞു കരഞ്ഞു. അടുത്ത ദിവസം തന്നെ അവര് സ്കൂളില് വന്ന് പ്രിന്സിപ്പാളിനെ കണ്ട് കാര്യം പറയുകയും ഉപദ്രവിച്ച് അര്ഹിച്ച ശിക്ഷ വാങ്ങി നല്കുകയും ചെയ്തു. എന്റെ മുടിയില് വരെ അവര് പരീക്ഷണങ്ങള് നടത്തുമായിരുന്നു. ഇതു കാണുന്ന ബന്ധുക്കള് പറയും. അത് നിങ്ങളുടെ മകനാണ്. മകളല്ല. മുടി വെട്ടാന് പറയൂ. എന്ന് പറഞ്ഞ് ദേഷ്യപ്പെടും. അവന് അതാണിഷ്ടം. ആരെയും ഉപദ്രവിക്കാത്തിടത്തോളം അവനിഷ്ടമുള്ളത് ചെയ്യാം. എന്നായിരുന്നു അവരുടെ മറുപടി.
എനിക്ക് ഒരിക്കലും സ്ത്രീകളോട് ആകര്ഷണം തോന്നില്ലെന്ന് ഞാന് അമ്മയോട് പറഞ്ഞു. എനിക്കറിയാം എന്നായിരുന്നു അമ്മയുടെ മറുപടി. ഞാന് പൊട്ടിക്കരഞ്ഞു പോയി. സാരമില്ല, എന്നു പറഞ്ഞ് എന്നെ സമാധാനിപ്പിച്ച അമ്മ ഇക്കാര്യം രണ്ടു ദിവസത്തിനകം തന്നെ അച്ഛനോട് പറഞ്ഞു. നീ സന്തോഷവാനായാല് ഞാനും സന്തോഷിക്കും. എന്നായിരുന്നു അച്ഛന് പറഞ്ഞത്. അമ്മ എപ്പോഴും ഡാന്സ് ക്ലാസില് ചേരാന് പറയുമായിരുന്നു. അങ്ങനെയാണ് ബെല്ലി ഡാന്സ് പരിശീലനം ആരംഭിച്ചത്. ഓരോ ക്ലാസിനു ശേഷവും ഞാന് അന്നത്തെ പാഠങ്ങള് അവരെ ചെയ്തു കാണിക്കും. ഇന്ന് എന്റെ സഹോദരിയും ഞാനും ഒരേ വസ്ത്രമാണ് മാറി ഉപയോഗിക്കുന്നത്.''
