ഇന്ത്യൻ സിനിമയുടെ സംഗീത ചക്രവര്ത്തി എസ് പി ബാലസുബ്രഹ്മണ്യം ഓര്മ്മയായതിന് ശേഷം അദ്ദേഹത്തിനുള്ള അനുശോചന കുറിപ്പുകള് സോഷ്യൽമീഡിയയിലുള്പ്പെടെ പലരും പങ്കുവെച്ചിട്ടുണ്ട്. ഇന്നലെ മുതൽ പല താരങ്ങളും ആരാധകരും അദ്ദേഹത്തെ കുറിച്ചുള്ള ഓര്മ്മകളും മറ്റും കുറിച്ച് അനുശോചനമറിയിച്ചിട്ടുണ്ട്. ഇപ്പോഴിതാ സംഗീത സംവിധായകൻ എം ജയചന്ദ്രൻ തനിക്ക് എസ് പി ബിയെ കുറിച്ചുള്ള ഓര്മ്മകള് പങ്കുവെച്ചിരിക്കുകയാണ്.
ശിക്കാർ എന്ന സിനിമയിലെ 'പ്രതിഘടിന്സു' എന്ന തെലുഗു ഗാനം എസ് പി ബി സർ പാടണം എന്നു ഞാൻ ആഗ്രഹിച്ചു. എന്റെ ഓര്കസ്ട്ര മാനേജര് വിന്സെന്റ് ചേട്ടൻ അദ്ദേഹത്തിന്റെ അസിസ്റ്റന്റിനോട് സംസാരിച്ചു. പാട്ടു റെക്കോർഡ് ചെയ്യാൻ ചെന്നൈയിലെ മ്യൂസിക് ലൊഞ്ച് സ്റ്റുഡിയോയിൽ രണ്ടു ദിവസത്തിനകത്തു എസ് പി ബി സർ എത്തും എന്നു ഉറപ്പു കിട്ടി. ആദ്യമായ് അദ്ദേഹത്തിന്റെ കൂടെ ജോലി ചെയ്യുന്നതിന്റെ ത്രില്ലിലായിരുന്നു ഞാൻ .
അടുത്ത ദിവസമായപ്പോൾ വിൻസെന്റ് ചേട്ടൻ എന്നെ വിളിച്ചിട്ടു പറഞ്ഞു. "കുട്ടാ ,എസ് പി ബി സാറിന് പാട്ട് കേൾക്കണം, ഉടൻ അത് അയച്ചു കൊടുക്കണം" എന്തിനാണ് അദ്ദേഹം എന്റെ പാട്ട് ഇവാലുവേറ്റ് ചെയ്യുന്നത് എന്ന തോന്നൽ വല്ലാതെ മനസ്സിനെ അസ്വസ്ഥമാക്കികൊണ്ടേയിരുന്നു. ഇദ്ദേഹത്തെ പാടാൻ വിളിക്കേണ്ടായിരുന്നു എന്നൊക്കെ ചിന്തിച്ചു അനാവശ്യമായ ഈഗോ എന്നിൽ പടർന്നു കയറി.
അടുത്ത ദിവസം അദ്ദേഹം കൃത്യ സമയത്തു തന്നെ സ്റ്റുഡിയോയിൽ എത്തി. സ്വയം കുനിഞ്ഞു തന്റെ ചെരുപ്പുകൾ കൈകൊണ്ടെടുത്തു ഷൂ റാക്കിലെ ഇടത്തിൽ കൃത്യമായി വച്ചു. എന്നിട്ടു എന്റെ തോളിൽ തട്ടീട്ടു പറഞ്ഞു, ഇത് വളരെ നല്ലൊരു പാട്ടാണ്, ഓര്കസ്ട്രേഷൻ ഏറെ ഇഷ്ടമായി എന്ന്. സ്റ്റുഡിയോയുടെ അകത്തേക്ക് കടന്നപ്പോഴേക്കും അദ്ദേഹം പറഞ്ഞു,
'ക്ഷമിക്കണം ,ഞാൻ ഇന്നലെ പാട്ടൊന്നു കേൾക്കണം എന്നു പറഞ്ഞിരുന്നു. അതിന്റെ കാരണം എനിക്ക് താങ്കളുടെ കോമ്പോസിഷനോട് നീതി പുലർത്താൻ സാധിക്കുമോ എന്നറിയാനാണ്. എസ് പി ബി എന്ന ഗായകന് ഒരുപാട് ലിമിറ്റേഷൻസ് ഉണ്ട്. എന്റെ പരിമിതികള് മൂലം നിങ്ങളുടെ കോമ്പോസിഷൻ മോശമാകാൻ ഞാനാഗ്രഹിക്കുന്നില്ല. പാട്ട് കേട്ടപ്പോൾ സമാധാനമായി. എനിക്കു നന്നായി പാടാൻ പറ്റും എന്നു കരുതുന്നു. ഇന്നലെ അർദ്ധരാത്രി വരെ കൺസർട്ട് ഉണ്ടായിരുന്നു. വീട്ടിലെത്തിയ ശേഷം പാട്ട് ശ്രദ്ധാപൂർവം പഠിച്ചു. ഇപ്പോൾ പാട്ട് ഏറെക്കുറെ ഗ്രഹിച്ചുവെന്ന് തോന്നുന്നുണ്ട്, നിങ്ങളുടെ വിലപ്പെട്ട സമയം അധികം എടുക്കില്ല'.
ഇതു കേട്ടപ്പോഴേക്കും, അദ്ദേഹത്തിന്റെ മുന്നിൽ ഞാൻ വെറുമൊരു സീറോ ആണെന്ന് എനിക്ക് മനസ്സിലായി. എന്റെ തെറ്റ് ഏറ്റുപറഞ്ഞു ആ കാൽക്കൽ വീണു നമസ്കരിച്ചു. ഒരു സംഗീതജ്ഞന് ഒരിക്കലും ഈഗോ പാടില്ല എന്നു അദ്ദേഹം എന്നെ പഠിപ്പിച്ചു. ഒരു പത്രപ്രവർത്തകൻ എസ് പി ബി സാറിനോട് ചോദിച്ചു. "താങ്കൾ നാല്പത്തിനായിരത്തിൽ പരം പാട്ടുകൾ പല ഭാഷകളിൽ പാടിയിട്ടുണ്ടല്ലോ, അത് ഒരു മഹാത്ഭുതമല്ലേ ?"
അദ്ദേഹം ഉത്തരം നൽകി, "ഞാൻ ഒരൊറ്റ ഭാഷയിലേ പാടിയിട്ടുള്ളു, that language is music”. എസ് പി ബി സർ !! അങ്ങയുടെ പാട്ടുകൾ ഞങ്ങളുടെ ഹൃദയങ്ങൾ ഏറ്റു പാടിക്കൊണ്ടേയിരിക്കും, അങ്ങയ്ക്ക് മരണമില്ല, എം ജയചന്ദ്രൻ ഫേസ്ബുക്കിൽ കുറിച്ചിരിക്കുകയാണ്.
