തിരുവനന്തപുരം: ബി.ജെ.പി. നേതൃത്വത്തിനു മുതിര്ന്ന നേതാവ് പി.പി. മുകുന്ദന്റെ രൂക്ഷവിമര്ശനം. ദേശീയ ഭാരവാഹി നിര്ണയത്തില് സംഘപരിവാര് പ്രവര്ത്തകരെ അവഗണിച്ചതിലാണ് അദ്ദേഹം ഫെയ്സ്ബുക്കിലൂടെ മുകുന്ദന് അമര്ഷം പ്രകടിപ്പിച്ചത്.
തല്ലെല്ലാം ചെണ്ടയ്ക്കും പണമെല്ലാം മാരാര്ക്കുമെന്ന അവസ്ഥ വരുന്നത് നല്ല പ്രവര്ത്തകരെ നിസംഗരാക്കും. സംഘസൗധം കെട്ടിയുയയര്ത്താന് രാപകല് അധ്വാനിച്ചവരെ വിസ്മരിക്കുന്നത് അത് കണ്ടുനില്ക്കുന്നവര്ക്കും തെറ്റായ സന്ദേശമാകും നല്കുക.
പുതുമുഖങ്ങള് വരട്ടെ. എന്നാല് കൂടെയുള്ള കഴിവുള്ളവരെ അവഗണിക്കരുത്. പ്രസ്ഥാനത്തില് പ്രവര്ത്തിക്കുന്നവരെ വിസ്മരിക്കുകയും പ്രതിയോഗികളുടെ ബന്ധുക്കള്ക്ക് അവസരം ഉണ്ടാക്കിക്കൊടുക്കുന്നതും ശരിയായ കീഴ്വഴക്കമല്ല. അത് സാങ്കേതികമായി ശരിയായിരിക്കാം പക്ഷേ പ്രസ്ഥാനത്തിന്റെ വളര്ച്ചയ്ക്കായി ചോര നീരാക്കിയവരെ വേദനിപ്പിക്കും. അവര് നിസംഗരായി മാറിയാല് ആരാണ് തെറ്റുകാരെന്നും അദേഹം ചോദിക്കുന്നു.
പാര്ട്ടി മാറിയെത്തിയ എ.പി. അബ്ദുള്ളക്കുട്ടി, ടോം വടക്കന് എന്നിവര്ക്ക് ദേശീയ നേതൃത്വത്തില് പൊടുന്നനെ പ്രാധാന്യം നല്കിയതിനെയാണ് മുകുന്ദന് പരോക്ഷമായി വിമര്ശിച്ചിരിക്കുന്നത്. കേരളത്തിലെ നേതാക്കളെ തഴഞ്ഞതില് ആര്.എസ്.എസിനടക്കുമുള്ള ശക്തമായ അമര്ഷമാണ് ഈ വാക്കുകളില് പ്രതിഫലിക്കുന്നത്.
ജി. അരുണ്
