തിരുവനന്തപുരം: തിരുവനന്തപുരം മെഡിക്കല് കോളേജിലെ കോവിഡ് നോഡല് ഓഫീസറെ സസ്പെന്ഡ് ചെയ്ത സംഭവത്തെ തുടര്ന്ന് ഡോക്ടര്മാര് നടത്തിവന്ന സമരം പിന്വലിച്ചു. ആരോഗ്യമന്ത്രി കെ.കെ. ശൈലജയുമായി സംയുക്ത സമരസമിതി നടത്തിയ ചര്ച്ചയെ തുടര്ന്നാണ് തീരുമാനം.
ആരോഗ്യപ്രവര്ത്തകര്ക്കെതിരായ നടപടി പുന:പരിശോധിക്കുമെന്ന് ചര്ച്ചയില് മന്ത്രി ഉറപ്പു നല്കിയിട്ടുണ്ട്. ഡിഎംഇയുടെ റിപ്പോര്ട്ടിന്റെ അടിസ്ഥാനത്തില് ഉത്തരവ് പുറത്തിറങ്ങും. നടപടി നേരിട്ടവര് ത്യാഗപൂര്ണമായ സേവനം ചെയ്തവരാണെന്നും എന്നാല് ചെറിയ ശതമാനം വീഴ്ചകള് ഉണ്ടാകുന്നത് യാഥാര്ത്ഥ്യമാണെന്നും മന്ത്രി പറഞ്ഞു.
തിരുവനന്തപുരം മെഡില് കോളേജില് ചികിത്സയിലിരുന്ന കോവിഡ് രോഗിയെ പുഴുവരിച്ച സംഭവത്തിലാണ് കോവിഡ് നോഡല് ഓഫീസര് ഉള്പ്പെടെ മൂന്ന് പേരെ സസ്പെന്ഡ് ചെയ്തത്. കോവിഡ് ചികിത്സയിലിരുന്ന വട്ടിയൂര്ക്കാവ് സ്വദേശി ആര്. അനില് കുമാറിനാണ് മെഡിക്കല് കോളേജില് നിന്ന് ദുരനുഭവമുണ്ടായത്.
