ന്യുഡല്‍ഹി: അഴിമതി കേസില്‍ ഉത്തരാഖണ്ഡ് മുഖ്യമന്ത്രിത്രിവേന്ദ്ര സിംഗ് റാവത്തിനെതിരെ സി.ബി.ഐ അന്വേഷത്തിന് ഹൈക്കോടതിയുടെ ഉത്തരവ് ചോദ്യം ചെയ്ത് മുഖ്യമന്ത്രി സുപ്രീം കോടതിയില്‍. ചൊവ്വാഴ്ചയാണ് ഹൈക്കോടതി സി.ബി.ഐ അന്വേഷണത്തിന് ഉത്തരവിട്ടത്. ഇതിനെതിരെയാണ് റാവത്ത് സ്‌പെഷ്യല്‍ ലീവ് പെറ്റീഷന്‍ സമര്‍പ്പിച്ചത്.
ജാര്‍ഖണ്ഡ് ബി.ജെ.പി അധ്യക്ഷനായിരുന്ന കാലത്ത് നടന്ന അഴിമതിയുമായി ബന്ധപ്പെട്ടാണ് കേസ്. നോട്ട നിമരാധന സമയത്ത് റാവത്ത് ബന്ധുവിന്റെ അക്കൗണ്ടില്‍ 25 ലക്ഷം രുപ നിക്ഷേപിച്ചുവെന്ന് മാധ്യമപ്രവര്‍ത്തകനായ ഉമേഷ് കുമാര്‍ ശര്‍മ്മയാണ് പുറത്തുകൊണ്ടുവന്നത്. ജാര്‍ഖണ്ഡിലെ ഗോവ് സേവ ആയോഗ് ചെയര്‍മാന്‍ ആയി നിയമിച്ചതിന് റാഞ്ചി സ്വദേശി നല്‍കിയ പണമാണിതെന്നും ഉമേഷ് കുമാര്‍ ശര്‍മ്മ പറയുന്നു.
സത്യം പുറത്തുവരേണ്ടത് അനിവാര്യമാണെന്നും സംശയങ്ങള്‍ നീക്കേണ്ടത് സംസ്ഥാനത്തിന്റെ താല്‍പര്യമാണെന്നും ഹൈക്കോടതി ചൂണ്ടിക്കാട്ടിയിരുന്നു. എന്നാല്‍ ഏതൊരു അന്വേഷണത്തിനും താല്‍ തയ്യാറാണെന്നും സി.ബി.ഐയെ സ്വാഗതം ചെയ്യുന്നുവെന്നും സത്യം പുറത്തുവരുമെന്ന് തനിക്ക് ഉറപ്പുണ്ടെന്നും റാവത്ത് പറഞ്ഞു.
ഉമേഷ് കുമാര്‍ ശര്‍മ്മയ്‌ക്കെതിരെ നെഹ്‌റു കോളനി പോലീസ് സ്‌റ്റേഷനില്‍ രജിസ്റ്റര്‍ ചെയ്തിരുന്ന ഗൂഢാലോചന കേസ് കോടതി റദ്ദാക്കുകയും ചെയ്തിരുന്നു. വിമര്‍ശത്തിന്റെ ശബ്ദം അടിച്ചമര്‍ത്താനാണ് ശ്രമിക്കുന്നതെന്ന പരാമര്‍ശവും കോടതി നടത്തി.
ഹൈക്കോടതി ഉത്തരവ് വന്നതിനു പിന്നാലെ മുഖ്യമന്ത്രിയുടെ രാജി ആവശ്യപ്പെട്ട് മുഖ്യപ്രതിപക്ഷമായ കോണ്‍ഗ്രസ് രംഗത്തെത്തി. കോടതി സ്വമേധയാ കേസെടുത്ത് സി.ബി.ഐ അന്വേഷണത്തിന് ഉത്തരവിട്ടത് കേസിന്റെ ഗൗരവം വ്യക്തമാക്കുന്നുവെന്ന് മുന്‍ മുഖ്യമന്ത്രിയും കോണ്‍ഗ്രസ് നേതാവുമായ ഹരീഷ് റാവത്ത് പറയുന്നു. ത്രിവേന്ദ്ര സിംഗ് റാവത്തിനെ പുറത്താക്കാന്‍ പ്രധാനമന്ത്രി നരേന്ദ്രമോഡിയും ആഭ്യന്തരമന്ത്രി അമിത് ഷായും ഇടപെടണമെന്നും ഹരീഷ് റാവത്ത് ആവശ്യപ്പെട്ടു.
Comments