ഭാര്യ ഗര്ഭിണിയായ സന്തോഷം ബന്ധുക്കളും സുഹൃത്തുക്കളുമായി പങ്കുവെയ്ക്കുന്ന ബേബി ഷവര് ചടങ്ങില് അപ്രതീക്ഷിത പ്രതികരണവുമായി യുവതിയുടെ ഭര്ത്താവ്. തുടര്ന്ന് ചടങ്ങിനെത്തിയ ബന്ധുക്കള് ചേര്ന്ന് ഭാര്യയുടെ കാമുകനെ കൈകാര്യം ചെയ്തു. സംഭവത്തിന്റെ വീഡിയോ സാമൂഹ്യമാധ്യമങ്ങളില് വൈറലാണ്.
സമൂഹ മാധ്യമ ഇടമായ റെഡ്ഡിറ്റിലാണ് വീഡിയോ പ്രത്യക്ഷപ്പെട്ടിരിക്കുന്നത്. വീഡിയോയ്ക്ക് പശ്ചാത്തലമായ സ്ഥലം കൃത്യമായി വ്യക്തമായിട്ടില്ലെങ്കിലും വീഡിയോയില് ആളുകള് സംസാരിക്കുന്ന ഭാഷ സ്പാനിഷാണ്. ചടങ്ങ് നടക്കുന്നിടത്തേയ്ക്ക് അഭിഭാഷകനുമായി കടന്നു വന്ന യുവാവ് ആളുകള്ക്ക് മുന്നില്വെച്ച് തന്റെ ഭാര്യയുടെ ഉദരത്തില് വളരുന്ന കുഞ്ഞ് തന്റേതല്ലന്നും അത് മറ്റൊരാളുടേതാണെന്നും പറയുന്നു. തന്റെ ഭാര്യയ്ക്ക് മറ്റൊരാളുമായി ബന്ധമുണ്ടെന്നും അതിന് തന്റെ പക്കല് ആവശ്യമായ തെളിവുകളുണ്ടെന്നും പറയുന്നു.
എന്താണ് സംഭവിക്കുന്നതെന്ന് വ്യക്തമാകാതെ അതിഥികള് നില്ക്കുമ്പോള് വക്കീല് ചില വീഡിയൊ ദൃശ്യങ്ങള് അതിഥികളെ കാണിച്ചുകൊടുക്കുന്നു. യുവതി തന്റെ കാമുകനൊപ്പം അര്ദ്ധനഗ്ന വേഷത്തില് നില്ക്കുന്ന ദൃശ്യങ്ങളായിരുന്നു അത്. ചടങ്ങ് തുടങ്ങി അല്പ്പസമയത്തിനകമാണ് ഭര്ത്താവ് ഇടയ്ക്ക് കയറിയത്. തുടര്ന്ന് അതേ വേദിയില് നിന്നും ഒരാളെ യുവാവ് പരിചയപ്പെടുത്തിക്കൊണ്ട് ഇതാണ് തന്റെ ഭാര്യയുടെ ഉദരത്തില് വളരുന്ന കുഞ്ഞിന്റെ അച്ഛന് എന്നും ഇത് ഇവര്ക്കുള്ള ചടങ്ങാണെന്നും താന് പോകുന്നുവെന്നും പറഞ്ഞ് വേദിയില് നിന്നും ഇറങ്ങിപ്പോകുന്നു.
ഇറങ്ങിപ്പോകുന്ന ഭര്ത്താവിനു പിന്നാലെ ഭാര്യ പോകുന്നതും തുടര്ന്ന് കാമുകനെ ആളുകള് ചേര്ന്ന് കൈകാര്യം ചെയ്യുന്നതുമെല്ലാം വീഡിയോയില് വ്യക്തമാണ്. ഇതിനോടകം നിരവധിപ്പേരാണ് വീഡിയൊ പങ്കുവെച്ചിട്ടുള്ളത്.
