ന്യൂഡല്ഹി: മാധ്യമപ്രവര്ത്തകന് അര്ണബ് ഗോസ്വാമിയെ അറസ്റ്റ് ചെയ്തതില് വിമര്ശനവുമായി ആഭ്യന്തരമന്ത്രി അമിത്ഷാ. സംസ്ഥാനത്തിന്റെ അധികാരം ദുര്വ്വിനിയോഗം ചെയ്യുന്ന നടപടിയെന്നും സ്വതന്ത്ര മാധ്യമപ്രവര്ത്തനത്തിന് മേലുള്ള കടന്നുകയറ്റമെന്നും മഹാരാഷ്ട്രാ സര്ക്കാരിന്റെ നിലപാടിനെ അമിത്ഷാ വിമര്ശിച്ചു. മാധ്യമസ്വാതന്ത്ര്യത്തെ ആക്രമിക്കുന്നതിന് ഉത്തരവാദികള് കോണ്ഗ്രസാണെന്നും അമിത്ഷാ പറഞ്ഞു. രണ്ടു വര്ഷം പഴക്കമുള്ള ഒരു ആത്മഹത്യാ കേസില് ഇന്ന് രാവിലെയാണ് അര്ണബിനെ മുംബൈയിലെ വസതിയില് നിന്നും മഹാരാഷ്ട്രാ പോലീസ് ബലമായി പിടിച്ചുകൊണ്ടു പോയത്.
സുശാന്ത് സിംഗ് രജപുത്തിന്റെ മരണവുമായി ബന്ധപ്പെട്ടും ടെലിവിഷന് റേറ്റിംഗ് അഴിമതിയുമായി ബന്ധപ്പെട്ടും മഹാരാഷ്ട്രാ പോലീസുമായി ഇടഞ്ഞു നില്ക്കുന്നതിനിടയിലാണ് അര്ണബിനെ റിപ്പബഌക് ടെലിവിഷനുമായി ബന്ധപ്പെട്ട് ആരോപണം ഉന്നയിച്ച് ആത്മഹത്യ ചെയ്ത ആര്ക്കിടെക്റ്റിന്റെ മരണവുമായി ബന്ധപ്പെട്ട് പോലീസ് കേസെടുത്തത്. അനേകം കേന്ദ്രമന്ത്രിമാരാണ് നടപടിക്കെതിരേ രംഗത്ത് വന്നിട്ടുള്ളത്. കോണ്ഗ്രസും കൂട്ടാളികളും ജനാധിപത്യത്തിന് വീണ്ടും നാണക്കേടുണ്ടാക്കുന്നു എന്നാണ് അമിത് ഷാ ട്വീറ്റ് ചെയ്തത്. റിപ്പബ്ലിക്ക് ടിവിയ്ക്കും അര്ണബിനും എതിരേ അധികാര ദുര്വ്വിനിയോഗം നടത്തുകയാണ്. ജനാധിപത്യത്തിന്റെ നാലാം തൂണിന്റെ സ്വാതന്ത്ര്യത്തെ കശാപ്പ് ചെയ്യുന്നു. മാധ്യമങ്ങള്ക്ക് നേരെയുള്ള ആക്രമണം എതിര്ക്കപ്പെടേണ്ടതാണെന്നും ട്വീറ്റില് പറഞ്ഞു.
53 കാരന് ഇന്റീരിയര് ഡിസൈനര് അന്വയ് നായിക്കിന്റെ ആത്മഹത്യയുമായി ബന്ധപ്പെട്ട് അദ്ദേഹത്തിന്റെ മകളുടെ പരാതിയിലാണ് പോലീസ് അര്ണബിനെ പിടിച്ചുകൊണ്ടുപോയത്. 2018 മെയ് യില് അലിബാഗിലായിരുന്നു അന്വയ് നായ്ക്കിന്റെ മരണം. ആത്മഹത്യാകുറിപ്പില് അര്ണബിന്റെയും ഫിറോസ് ഷെയ്ഖ്, നീതീഷാ സര്ദ എന്നിങ്ങനെ രണ്ടുപേരുടെ പേരുകളും ആത്മഹത്യാ കുറിപ്പില് ഉണ്ടായിരുന്നു. 5.40 കോടി രൂപ തരാനുണ്ടെന്നും സാമ്പത്തീക പ്രതിസന്ധിയെ തുടര്ന്ന് ആത്മഹത്യ ചെയ്യുകയാണെന്നുമാണ് കുറിച്ചിരുന്നത്. അന്വയ് യുടെ വൃദ്ധ മാതാവും മരണപ്പെട്ടിരുന്നു. എന്നാല് കൊടുക്കാനുണ്ടായിരുന്ന പണത്തിന്റെ 90 ശതമാനവും കൊടുത്തു തീര്ത്തിരുന്നു എന്നും എന്നാല് ബാക്കി തീര്ക്കാനുള്ള പണി തീര്ക്കാത്തതിനാല് ബാക്കി തുക നല്കിയില്ല എന്നുമാണ് ചാനല് പറയുന്നത്.
