നമ്പിക്കൊല്ലി : നെല്പ്പാടത്തില് ചിത്രം ഒരുക്കി രണ്ട് യുവാക്കള്. ചുണ്ടുരുമ്മുന്ന മീനുകളുടെ 3 ഡി ചിത്രമാണ് തയ്യാറാക്കിയിരിക്കുന്നത്. വ്യത്യസ്ത ഇനം നെല്ലുകള്കൊണ്ടാണ് ഈ ചിത്രം തയ്യാറാക്കിയിരിക്കുന്നത്. വയനാട് ബത്തേരി നമ്പിക്കൊല്ലി കഴമ്പുവയൽ പാടത്താണ് കണ്ണിനെ വിസ്മയിപ്പിക്കുന്ന ഈ കാഴ്ച . ആകാശത്തില് നിന്നും നേക്കിയാല് രണ്ട് മീനുകൾ എന്തോ കഥകൾ പറയുന്നുതുപോലെ തോന്നും. ഈ അപൂർവ്വ കാഴ്ചകള് ഒരുക്കിയിരിക്കുന്നത് രണ്ട് യുവാക്കളാണ്.
50 സെന്റ് വയലിലാണ് ത്രിമാന ചിത്രം ഒരുക്കിയിരിക്കുന്നത്. കർഷകനായ പ്രസീദും ചിത്രകാരനായ ഓടപ്പള്ളത്തെ എ വൺ പ്രസാദുമാണ് നെല്ലുകൊണ്ട് ചിത്രം തയ്യാറാക്കിയത്. പ്രസാദിന്റെ രൂപരേഖ പ്രകാരം വിവിധ തട്ടുകളായി നെൽവിത്തുകൾ പാകി. ഛത്തീസ്ഗഡിൽ നിന്നെത്തിച്ച സബർബാത്ത്, തമിഴ്നാട്ടിലെ കറുവാച്ചി, കൃഷ്ണകാമോദം തുടങ്ങി വ്യത്യസ്തമായ നെൽ ഇനങ്ങളാണ് വിവിധ നിറങ്ങൾക്ക് ഉപയോഗിച്ചത്. മല്ലിക്കുറുവ, രക്തശാലി , ജീരകശാല തുടങ്ങിയ വിത്തിനങ്ങളും മത്സ്യചിത്രത്തിന് ഉപയോഗിച്ചു. ചുറ്റും പല കളങ്ങളിലായി 51 ഇനം നെല്ലുകളാണ് വിതച്ചത്. നെൽകതിരുകളുടെ നിറമാണ് ചിത്രത്തെ മനോഹരമാക്കുന്നത്. മുൻപും വ്യത്യസ്തമാർന്ന ചിത്രങ്ങൾ പാടത്ത് ഇരുവരും തയ്യാറാക്കിയിരുന്നു.
