തുത്തുക്കുടി: കനത്ത മഴയില്‍ നീണ്ട നാലു മണിക്കൂറോളം ട്രാഫിക് നിയന്ത്രിച്ച പോലീസുകാരന്റെ വീഡിയോ ആണ് വൈറലാകുന്നത്. തമിഴ്‌നാട്ടില്‍ തുത്തുക്കുടി ജില്ലയിലെ ഏറ്റവും തിരക്കേറിയ റോഡുകളിലൊന്നിലാണ് കനത്ത മഴയെ വകവെയ്ക്കാതെ ട്രാഫിക് പോലീസുകാരന്‍ ഗതാഗതം നിയന്ത്രിച്ചത്.
കോണ്‍സ്റ്റബിള്‍ മുത്തുരാജ് ആണ് സോഷ്യല്‍മീഡിയയില്‍ ഹീറോ ആകുന്നത്. കനത്ത മഴയെ വകവെയ്ക്കാതെയുള്ള ആ കൃത്യനിര്‍വഹണത്തിന് പിന്നാലെ ഒരു സര്‍പ്രൈസും അദേഹത്തെ തേടിയെത്തി.
തലസ്ഥാനമായ ചെന്നൈയില്‍ നിന്ന് 600 കിലോമീറ്റര്‍ അകലെയുള്ള തെക്കന്‍ നഗരത്തിലെ തിരക്കേറിയ വിവിഡി ജംഗ്ഷനില്‍ ഗതാഗതക്കുരുക്ക് ഉണ്ടാകാതിരിക്കാന്‍ നാലു മണിക്കൂറോളമാണ് കനത്ത മഴയില്‍ അദേഹം ഡ്യൂട്ടി ചെയ്തത്. റെയിന്‍കോട്ട് അണിഞ്ഞ് ട്രാഫിക് നിയന്ത്രിക്കുന്ന അദേഹത്തിന്റെ വീഡിയോ ആണ് വൈറലായത്. തുടര്‍ന്ന് ഈ വീഡിയോ കണ്ട് പോലീസ് സൂപ്രണ്ട് എസ്.ജയകുമാര്‍ തന്നെ നേരിട്ട് സ്ഥലത്തെത്തി. പ്രത്യേക സമ്മാനം നല്‍കിയാണ് അദേഹത്തെ എസ്പി ആദരിച്ചത്.
Comments