ഹൈദരാബാദ്: ആന്ധ്രപ്രദേശിലെ അമലാപുരം എംപിയും പ്രമുഖ നേതാവുമായിരുന്ന ജിവി ഹര്ഷകുമാര് കോണ്ഗ്രസിലേക്ക് തിരിച്ചെത്തി. ആന്ധ്രപ്രദേശിന്റെ സംഘടന ഉത്തരവാദിത്വമുള്ള എഐസിസി ജനറല് സെക്രട്ടറി ഉമ്മന്ചാണ്ടിയുടെ സാന്നിദ്ധ്യത്തിലാണ് പാര്ട്ടി ആസ്ഥാനത്ത് നടന്ന ചടങ്ങില് ഹര്ഷകുമാര് കോണ്ഗ്രസില് തിരികെ ചേര്ന്നത്. കോണ്ഗ്രസ് വിട്ടുപോയ നേതാക്കളെ തിരികെ എത്തിക്കാന് നടത്തുന്ന ശ്രമങ്ങളുടെ ഫലമായി നേരത്തെ മടങ്ങിയെത്തിയ മുന് മുഖ്യമന്ത്രി കിരണ്കുമാര് റെഡ്ഡിക്ക് പിന്നാലെയാണ് ഹര്ഷകുമാറും എത്തിയിരിക്കുന്നത്.
ആന്ധ്രാപ്രദേശിന്റെ മുന് മുഖ്യമന്ത്രി വൈഎസ് രാജശേഖര് റെഡ്ഡിയുടെ അടുത്ത അനുയായിരുന്നു ഹര്ഷകുമാര് അദ്ദേഹത്തിന്റെ മരണത്തിന് പിന്നാലെ പാര്ട്ടിയിലുണ്ടായ ഉള്പ്പോരിനെ തുടര്ന്നാണ് പാര്ട്ടി വിട്ടത്. ആന്ധ്രപ്രദേശിലെ അവസാനത്തെ കോണ്ഗ്രസ് മുഖ്യമന്ത്രിയായിരുന്ന കിരണ് കുമാര് റെഡ്ഡി രൂപീകരിച്ച പാര്ട്ടിയില് ചേര്ന്നു. എന്നാല് 2014ല് തെലുങ്ക് ദേശം പാര്ട്ടി വന് വിജയം നേടിയ മത്സരത്തില് തോറ്റതോടെ ടിഡിപിയില് ചേര്ന്നെങ്കിലൂം അവിടെ ക്ലച്ചു പിടിക്കാതെ കോണ്ഗ്രസിലേക്ക് തിരികെ പോരുകയായിരുന്നു.
കോണ്ഗ്രസിലേക്ക് മടങ്ങാനുള്ള ആഗ്രഹത്തിലായിരുന്നു താനെന്ന് ഹര്ഷകുമാര് പറഞ്ഞു. കോണ്ഗ്രസിന്റെ ആന്ധ്രയുടേയും തെലുങ്കാനയുടേയും ചുമതല ഏറ്റെടുത്ത് ഇവിടെ എത്തിയ മുന് കേരളാ മുഖ്യമന്ത്രിയും കോണ്ഗ്രസ് നേതാവുമായ ഉമ്മന്ചാണ്ടിയാണ് ഹര്ഷകുമാറിനെ തിരികെ എത്തിക്കാന് ചുക്കാന് പിടിച്ചത്. ആന്ധ്രപ്രദേശ് കോണ്ഗ്രസ് സംസ്ഥാന അദ്ധ്യക്ഷന് ശൈലജാനാഥ്, തെലങ്കാന കോണ്ഗ്രസ് നേതാവ് വി ഹനുമന്ത റാവു. കൊപ്പുല രാജു എന്നിവരുടെ സാന്നിദ്ധ്യത്തിലാണ് ഹര്ഷകുമാറിന്റെ തിരിച്ചുവരവ്.
പതിറ്റാണ്ടുകളോളം ശക്തി കേന്ദ്രമായിരുന്ന ആന്ധ്രയിലും പിന്നാലെ രൂപീകരിച്ച തെലുങ്കാനയിലും പാര്ട്ടിയുടെ നില ദുരിതത്തിലാണ്. വൈഎസ് രാജശേഖര റെഡ്ഡിയ്ക്ക് ശേഷം കാര്യമായ മുന്നേറ്റം ആന്ധ്രയില് ഉണ്ടാക്കാന് കോണ്ഗ്രസിന് കഴിഞ്ഞിട്ടില്ല. ആന്ധ്രയില് നിന്നും ഒരു വിഭാഗം വേര്പെടുത്തി തെലുങ്കാന ഉണ്ടാക്കിയെങ്കിലും അവിടെയും കാര്യങ്ങള് കൈവിട്ടുപോയി. രണ്ടിടത്തും നഷ്ടപ്പെട്ട ഗ്രിപ്പ് തിരിച്ചു പിടിക്കുകയാണ് കോണ്ഗ്രസിന്റെ ഇപ്പോഴത്തെ ലക്ഷ്യം. അതിന്റെ ഭാഗമായി കൈവിട്ടുപോയ പഴയ നേതാക്കളെ തിരിച്ചുപിടിക്കാനുള്ള ശ്രമത്തിലാണ് കോണ്ഗ്രസ്.
പാര്ട്ടിയില് നിന്നും കലഹിച്ചു നില്ക്കുന്നവരെ അനുനയിപ്പിക്കുകയും പാര്ട്ടി വിട്ടവരെ തിരികെ കൊണ്ടുവരികയുമെല്ലാമാണ് കോണ്ഗ്രസിന്റെ പ്രാഥമിക ലക്ഷ്യങ്ങളില് ഒന്ന്. നിലവില് ആന്ധ്രയിലും തെലുങ്കാനയിലും അനേകം നേതാക്കളാണ് കോണ്ഗ്രസിലേക്ക് തിരിച്ചുവന്നിരിക്കുന്നത്.
ആന്ധ്ര നിയമസഭയില് ഒരു അംഗം പോലും കോണ്ഗ്രസിനില്ല. തെലങ്കാനയില് ഉള്ളത് ആറു പേരും. തെലുങ്കാന നിയമസഭാ തിരഞ്ഞെടുപ്പില് 19 സീറ്റ് കിട്ടിയെങ്കിലും പത്തിലധികം പേര് ടിആര്എസില് ചേര്ന്നു. നിലവില് ഒവൈസിയുടെ പാര്ട്ടിക്കും പിന്നിലാണ് തെലങ്കാന നിയമസഭയിലെ പാര്ട്ടിയുടെ സ്ഥാനം. അടുത്ത നിയമസഭാ തിരഞ്ഞെടുപ്പില് മികച്ച പ്രകടനമാണ് കോണ്ഗ്രസ് ലക്ഷ്യമിട്ടിരിക്കുന്നത്. ഹര്ഷകുമാറിന്റെ തിരിച്ചു വരവിന് പിന്നാലെ ബിജെപിയിലേക്ക് കാല് നീട്ടിയ തെലങ്കാന കോണ്ഗ്രസ് സംസ്ഥാന ഉപാദ്ധ്യക്ഷനും എംപിയുമായ എ രേവന്ത് റെഡ്ഡി നീക്കം ഉപേക്ഷിച്ചതായിട്ടാണ് വാര്ത്തകള്. താന് ബിജെപിയിലേക്ക് പോകുന്നു എന്നത് വ്യാജ വാര്ത്തയാണെന്നാണ് രേവന്ത് പറയുന്നത്.
