ന്യൂഡല്ഹി: കാര്ഷിക നിയമങ്ങള്ക്കെതിരെ പ്രതിപക്ഷം സ്വീകരിക്കുന്ന നിലപാടുകള്ക്കെതിരെ വിമര്ശനവുമായി കേന്ദ്ര നിയമമന്ത്രി രവിശങ്കര് പ്രസാദ്. കാര്ഷിക നിയമങ്ങള് സംബന്ധിച്ച് ഒരു ലജ്ജയുമില്ലാത്ത ഇരട്ട നിലപാടാണ് പ്രതിപക്ഷവും മറ്റ് രാഷ്ട്രീയ കക്ഷികളും സ്വീകരിക്കുന്നതെന്ന് അദേഹം കുറ്റപ്പെടുത്തി.
നരേന്ദ്ര മോഡി സര്ക്കാര് കാര്ഷിക മേഖലയിലെ പരിഷ്കരണത്തിനായി ഇപ്പോള് ചെയ്യുന്ന കാര്യങ്ങള് തന്നെയാണ് കോണ്ഗ്രസിന്റെ നേതൃത്വത്തിലുള്ള യുപിഎ സര്ക്കാരിന്റെ കാലത്ത് ചെയ്തത്. പ്രതിപക്ഷം എതിര്ക്കാന്വേണ്ടി മാത്രം എതിര്ക്കുകയാണ്.
കോണ്ഗ്രസിന്റെ 2019 ലെ പ്രകടനപത്രികയില് എപിഎംസി നിയമം റദ്ദാക്കുമെന്ന് വാഗ്ദാനം ചെയ്തിരുന്നതായും അദേഹം ചൂണ്ടിക്കാട്ടി. കാര്ഷിക നിയമത്തെ എതിര്ക്കുന്ന ശരദ് പവാര് കൃഷിമന്ത്രിയായിരുന്ന കാലത്ത് വിപണിയില് സ്വകാര്യ മേഖലയുടെ പങ്കാളിത്തം വര്ധിപ്പിക്കണമെന്നാവശ്യപ്പെട്ട് എല്ലാ മുഖ്യമന്ത്രിമാര്ക്കും കത്തയച്ചിരുന്നതായും രവിശങ്കര് പ്രസാദ് പറഞ്ഞു.
