ന്യൂഡല്ഹി: കഴിഞ്ഞ യുപിഎ സര്ക്കാരിലെയും പുതിയതായി വന്ന എന്ഡിഎ സര്ക്കാരുമായും ബന്ധപ്പെട്ട ഒട്ടേറെ വെളിപ്പെടുത്തലുകള് വരുന്ന മുന് രാഷ്ട്രപതി പ്രണബ് മുഖര്ജിയുടെ പുസ്തക രൂപത്തിലുള്ള ഓര്മ്മകളുടെ അവസാന വോള്യം അടുത്ത മാസം പുറത്തു വരും.
ഒട്ടേറെ വിവാദ വെളിപ്പെടുത്തല് ഉള്പ്പെട്ടിട്ടുള്ള അവസാന ഭാഗത്തില് പ്രധാനമന്ത്രിയായുള്ള നരേന്ദ്രമോഡിയുടെ ആദ്യ ടേമില് അദ്ദേഹം ഏകാധിപതിയെ പോലെയായിരുന്നു എന്നും യുപിഎ സര്ക്കാരിന്റെ പിടിവിട്ടു പോയത് സോണിയാഗാന്ധിയുടേയും മന്മോഹന് സിംഗിന്റെയും കഴിവു കേടാണെന്നും പറഞ്ഞിട്ടുണ്ട്. മന്മോഹന് സിംഗിന്റെ നേതൃത്വത്തിലുള്ള യുപിഎ സര്ക്കാരിന്റെ അവസാന രണ്ടാം സമയത്തും നരേന്ദ്രമോഡി പ്രധാനമന്ത്രിയായുള്ള ആദ്യ ടേമിലും പ്രണബ് മുഖര്ജിയായിരുന്നു രാഷ്ട്രപതി. 'ദി പ്രസിഡന്ഷ്യല് ഇയേഴ്സ്' എന്നാണ് ഓര്മ്മക്കുറിപ്പിന്റെ പേര്.
സഖ്യകക്ഷികളെ പരിപാലിച്ചു കൊണ്ടുപോകാനും നിലനിര്ത്താനും ഏറെ പാടുപെട്ടതായിരുന്നു മന്മോഹന് സിംഗിന്റെ കാലം. അതേസമയം തന്റെ ആദ്യ ടേം കാര്യമായ പ്രശ്നങ്ങള്ക്ക് സാധ്യതയിടാതെ ഏകാധിപതിയുടെ രീതിയിലുള്ള രാജ്യ പരിപാലനമാണ് മോഡി നടത്തിയതെന്നും പുസ്തകത്തില് പറയുന്നു. 2012 മുതല് 2017 വരെയായിരുന്നു പ്രണബ് മുഖര്ജി രാഷ്ട്രപതിയായിരുന്നത്.
അഞ്ചു ദശകത്തോളം കോണ്ഗ്രസിന്റെ നേതാവായിരുന്ന പ്രണബ് മുഖര്ജി കോണ്ഗ്രസിനെ രൂക്ഷമായി വിമര്ശിക്കാനും മടിച്ചില്ല. ഒരു പക്ഷേ ആയിരുന്നെങ്കില് മന്മോഹന് സിംഗിനേക്കാള് മികച്ച പ്രധാനമന്ത്രിയായിരുന്നേനെ താനെന്ന് കോണ്ഗ്രസുകാര് വിശ്വസിച്ചിരുന്നതായും പറയുന്നുണ്ട്. 2004 ല് താന് പ്രധാനമന്ത്രിയായിരുന്നെങ്കില് 2014 ലോക്സഭാ തെരഞ്ഞെടുപ്പില് കോണ്ഗ്രസിന് ഇത്രയും വലിയ വീഴ്ച ഉണ്ടാകില്ലായിരുന്നു എന്ന് വിശ്വസിക്കുന്നവര് ഏറെയാണ്.
താന് രാഷ്ട്രപതിയായി സ്ഥാനമേറ്റതോടെ കോണ്ഗ്രസ് നേതൃത്വത്തിന് രാഷ്ട്രീയ ശ്രദ്ധ നഷ്ടമായി. പാര്ട്ടിയിലെ പ്രശ്നങ്ങളും കാര്യങ്ങളും സോണിയാഗാന്ധിക്ക് കൈകാര്യം ചെയ്യാന് കഴിയാത്ത സ്ഥിതിയായി. ഡോ. മന്മോഹന് സിംഗിന് സഭയില് നിന്നും അകന്നു നിന്നതിനാല് എംപിമാരുമായുള്ള സ്വകാര്യബന്ധം അദ്ദേഹത്തിന് നഷ്ടമാകുകയും ചെയ്തു. സോണിയാഗാന്ധിയുടേയും മന്മോഹന് സിംഗിന്റെയും നേതൃത്വത്തിലുള്ള യുപിഎ സര്കകാര് 2014 ല് വന് പരാജയമാണ് നേരിട്ടത്.
മന്മോഹന്സിംഗിന്റെ പ്രധാനമന്ത്രിയായുള്ള രണ്ടാം വട്ടം 2009 മുതല് 2014 വരെയായിരുന്നു. 2014 ലായിരുന്നു കോണ്ഗ്രസിന് വന് പരാജയം സമ്മാനിച്ചു കൊണ്ട് നരേന്ദ്രമോഡിയുടെ പ്രധാനമന്ത്രിയായുള്ള ആദ്യ ഊഴം. അതേസമയം താന് രണ്ടുപേരുമായും നല്ല ബന്ധം കാത്തുസൂക്ഷിച്ചിരുന്നതായും പറയുന്നു. മരണത്തിന് ശേഷം പുറത്തുവന്ന പ്രണബ് മുഖര്ജിയുടെ ഓര്മ്മക്കുറിപ്പുകള് അടങ്ങിയ പുസ്തകം 2021 ജനുവരി ആദ്യം പുറത്തുവരുമെന്ന് പ്രസാധകരായ രൂപാ ബുക്സ് പറഞ്ഞു.
