തിരുവന്തപുരം : കർഷക സംഘടനകളെ ചേർത്ത് കേരള വ്യാപാരി വ്യവസായി ഏകോപന സമിതി രാഷ്ട്രീയ പാർട്ടി രൂപീകരിക്കുന്നു. വരുന്ന നിയമസഭാ തിരഞ്ഞെടുപ്പിൽ മത്സരിക്കുമെന്ന തീരുമാനത്തോടെ രൂപീകരിക്കുന്ന പാര്ട്ടിക്ക്‘കേരള കർഷക വ്യാപാരി പാർട്ടി’ എന്നായിരിക്കും പേര്.
ഈ മാസം തന്നെ ഒരുലക്ഷം പേരെ അണിനിരത്തി പാർട്ടി പ്രഖ്യാപിക്കാനാണ് കേരള വ്യാപാരി വ്യവസായി ഏകോപന സമിതിയുടെ തീരുമാനം. പാർട്ടി പ്രഖ്യാപനത്തിന് മുന്നോടിയായി കർഷക സംഘടനകളുമായി ചർച്ച പൂർത്തിയാക്കിയിട്ടുണ്ട്.മുന്നണികളോട് നിലവിൽ സമദൂര നയമാണ്. ചർച്ചകൾക്കായുള്ള വാതിൽ അടയ്ക്കേണ്ടെന്നാണ് ഇവരുടെ തീരുമാനം.
പത്തരലക്ഷം അംഗങ്ങളുള്ള ഏകോപന സമിതിക്ക് പ്രധാന രാഷ്ട്രീയ പാർട്ടിയായി വളരാനാവുമെന്നാണ് കണക്കുകൂട്ടൽ. കൃഷിക്കാരും ചെറുകിട കച്ചവടക്കാരുമാണ് രാജ്യത്തെ മുഴുവൻ നയിക്കുന്ന സാമ്പത്തികശേഷിയെന്ന് ഏകോപന സമിതി സംസ്ഥാന പ്രസിഡന്റ് ടി. നസറുദ്ദീൻ പറഞ്ഞു. അവന്റെ കൈ അവന്റെ തലയ്ക്കുവെച്ച് ഉറങ്ങണം അതിനാണ് പാർട്ടി ഉണ്ടാക്കിയതെന്നും അദ്ദേഹം പറഞ്ഞു.
