സംഗീത സംവിധായകന് കൈലാസ് മേനോനും ഭാര്യ അന്നപൂര്ണ ലേഖ പിള്ളയ്ക്കും 2020 ഓഗസ്റ്റ് 17-നാണ് ആണ്കുഞ്ഞ് പിറന്നത്. സമന്യു രുദ്ര എന്നാണ് മകന് പേരിട്ടിരിയ്ക്കുന്നത്. മകന്റെ നിരവധി ചിത്രങ്ങളും വിഡിയോകളും കൈലാസ് മേനോന് ആരാധകര്ക്കായി പങ്കുവെയ്ക്കാറുണ്ടായിരുന്നു. ഇപ്പോള് മകന്റെ ഒരു ക്യൂട്ട് വിഡിയോയുമായി എത്തിയിരിയ്ക്കുകയാണ് കൈലാസ് മേനോന്.
'സ്റ്റീഫന് ദേവസീ...നിങ്ങള് തീര്ന്നു'- എന്ന തലക്കെട്ടോടു കൂടി കുഞ്ഞ് കീബോര്ഡ് വായിക്കാന് ശ്രമിയ്ക്കുന്ന വിഡിയോയാണ് കൈലാസ് മേനോന് പങ്കുവെച്ചിരിയ്ക്കുന്നത്. കൈലാസിന്റെ കൈകളിലിരുന്ന് കുഞ്ഞ് കൈകള് കൊണ്ട് കീബോര്ഡില് തട്ടി നോക്കുകയാണ് കുഞ്ഞ്. വിഡിയോയ്ക്കു താഴെ ശിവദ, ഗൗരി നന്ദ തുടങ്ങി പ്രമുഖര് ഉള്പ്പെടെ നിരവധി പേര് പ്രതികരണങ്ങളുമായെത്തിയിട്ടുണ്ട്.
സമന്യു രുദ്ര എന്ന കൗതുകകരമായ പേരിനു പിന്നിലെ രഹസ്യം കൈലാസ് വെളിപ്പെടുത്തിയിരുന്നു. സമന്യു, രുദ്ര എന്നിവ ശിവന്റെ പേരുകളാണ്. ഒരേ മനസ്സുള്ളവര് എന്നാണ് സമന്യു എന്ന വാക്കിന്റെ അര്ഥം. ദുരിതത്തിന്റെയും തിന്മയുടെയും അന്തകന് എന്നാണ് രുദ്രയുടെ അര്ഥം.
