തിരുവന്തപുരം: ചലച്ചിത്ര അക്കാദമി ചെയര്മാന് സ്ഥാനം കമല് രാജിവയ്ക്കണമെന്ന് പ്രതിപക്ഷനേതാവ് രമേശ് ചെന്നിത്തല. അക്കാദമിയില് കമല് നടത്തിയ എല്ലാ പ്രവര്ത്തനങ്ങളും അന്വേഷിക്കണമെന്നും അദേഹം ആവശ്യപ്പെട്ടു. സര്ക്കാര് ശമ്പളം വാങ്ങുന്നയാള് രാഷ്ട്രീയത്തിനതീതമായി പ്രവര്ത്തിക്കണമെന്നും പ്രതിപക്ഷനേതാവ് പറഞ്ഞു.
ചലച്ചിത്ര അക്കാദമിയില് ഇടതുപക്ഷ സ്വഭാവം നിലനിര്ത്തുന്നതിന് നാലു താല്ക്കാലിക ജീവനക്കാരെ സ്ഥിരപ്പെടുത്തണമെന്നാവശ്യപ്പെട്ടുകൊണ്ട് കമല് മന്ത്രി എ കെ ബാലന് അയച്ച കത്ത് പ്രതിപക്ഷനേതാവ് നിയമസഭയില് പുറത്തുവിട്ടിരുന്നു. സംഭവം വിവാദമായതോടെ വിശദീകരണവുമായി കമല് രംഗത്തെത്തിയിരുന്നു. വീഴ്ച പറ്റിയെന്ന് കമല് സമ്മതിക്കുകയും ചെയ്തിരുന്നു. ആ സംഭവത്തില് കോണ്ഗ്രസ് ബിജെപി നേതാക്കള് കമലിനെതിരെ രംഗത്തെത്തിയിരുന്നു.
