മുംബൈയിലെ ഖാര് ദണ്ഡ നാകയിലെ ഓട്ടോറിക്ഷ ഡ്രൈവറായ ദേശ്രാജ് പേരക്കുട്ടിയുടെ ഉപരിപഠനത്തിനായി വീടു വിറ്റ കഥ ഹ്യൂമന്സ് ഓഫ് ബോംബെ എന്ന ഫെയ്സ്ബുക്ക് പേജില് പങ്കുവെച്ചിരുന്നു. അദ്ദേഹത്തിന്റെ ജീവിതത്തെ കുറിച്ച് സോഷ്യല് മീഡിയയില് വൈറലായതോടെ നിരവധി പേരാണ് സഹായവുമായി എത്തിയത്. ദേശ്രാജിന് 20 ലക്ഷം രൂപ സമാഹരിക്കാന് ആഗ്രഹിച്ച ഒരു ക്രൗഡ് ഫണ്ടിംഗ് സംരംഭം ഒടുവില് 24 ലക്ഷം രൂപ സ്വരൂപിച്ചു. തുകയുടെ ചെക്ക് അദ്ദേഹത്തിന് കൈമാറി. ദേശ്രാജിനെ സഹായിക്കണമെന്ന് ആവശ്യപ്പെട്ട് കോണ്ഗ്രസ് നേതാവ് അര്ച്ചന ഡാല്മിയയും അദ്ദേഹത്തിന്റെ ജീവിതത്തെ കുറിച്ച് സോഷ്യല് മീഡിയയില് പോസ്റ്റ് ചെയ്തിരുന്നു.
'' ആറ് വര്ഷം മുമ്പ്, എന്റെ മൂത്ത മകനെ വീട്ടില് നിന്ന് പെട്ടെന്ന് കാണാതായി. പതിവുപോലെ ജോലിക്ക് പോയ മകന്, പക്ഷേ തിരിച്ചെത്തിയില്ല'' - ഹ്യൂമന്സ് ഓഫ് ബോംബെക്ക് നല്കിയ അഭിമുഖത്തില് ദേശരാജ് പറഞ്ഞു. ഒരാഴ്ചയ്ക്ക് ശേഷമാണ് മൂത്ത മകന്റെ മൃതദേഹം കണ്ടെത്തിയത്. മാനസികമായി തകര്ന്നെങ്കിലും ഉത്തരവാദിത്തങ്ങള് ഉള്ളതിനാല് വിലപിച്ചിരിക്കാന് സമയമില്ലായിരുന്നു. അതിനാല്, അടുത്ത ദിവസം തന്നെ തന്റെ ഓട്ടോയുമായി റോഡിലേക്ക് ഇറങ്ങി. മൂത്ത മകന് മരിച്ച് രണ്ട് വര്ഷത്തിന് ശേഷം, ദേശ്രാജിന്റെ ഇളയ മകന് ആത്മഹത്യ ചെയ്തു. എന്റെ മരുമകളെയും അവരുടെ നാല് മക്കളെയും നോക്കണമെന്ന ഉത്തരവാദിത്ത ബോധമാണ് എന്നെ മുന്നോട്ട് നയിച്ചതെന്ന് ദേശരാജ് പറയുന്നു.
തുടര്ന്ന് കുടുംബത്തിന് വേണ്ടി ഈ പ്രായത്തിലും കൂടുതലായി അധ്വാനിക്കേണ്ടി വന്നു. രാവിലെ 6 മണിക്ക് വീട് വിട്ടിറങ്ങിയാല് അര്ദ്ധരാത്രി വരെ ഓട്ടോ ഓടിച്ച് പ്രതിമാസം 10,000 രൂപ സമ്പാദിക്കും. മിക്ക ദിവസങ്ങളിലും ഞങ്ങള്ക്ക് കഴിക്കാന് ഒന്നും ഉണ്ടാകാറില്ലെന്നും ദേശ്രാജ് പറയുന്നു. മാസത്തില് കിട്ടുന്ന ആകെ വരുമാനത്തില് 6,000 രൂപ പേരക്കുട്ടികളുടെ വിദ്യാഭ്യാസത്തിനായി നല്കും, 7 പേരുള്ള ഒരു കുടുംബത്തെ പോറ്റുന്നത് ബാക്കിയുള്ള 4,000 രൂപ കൊണ്ടാണ്. തന്റെ പേരക്കുട്ടിക്ക് ബിഎഡ് കോഴ്സിനായി ഡല്ഹിയിലേക്ക് പോകണമെന്ന ആഗ്രഹം നിറവേറ്റാന് ദേശ്രാജ് തന്റെ വീട് വിറ്റു. 'എനിക്ക് അവളുടെ സ്വപ്നങ്ങള് എന്തു വില കൊടുത്തും നിറവേറ്റേണമായിരുന്നു. അതിനാല്, ഞാന് ഞങ്ങളുടെ വീട് വിറ്റ് അവളുടെ ഫീസ് അടച്ചു' - അദ്ദേഹം പങ്കുവെച്ചു. ഈ കഥ അറിഞ്ഞാണ് അദ്ദേഹത്തെ സഹായിക്കാന് പലരും മുന്നോട്ട് വന്നത്.
