ലക്നൗ: ടീം ഇന്ത്യ ടെസ്റ്റ് ലോകകപ്പ് ഫൈനലില് കടന്നതിന്റെയും ഇംഗഌണ്ടിനെതിരേ പരമ്പര വിജയം നേടിയതിന്റെയും ആഘോഷത്തില് ഇന്ത്യന് ആരാധകര് മതി മറക്കുമ്പോള് വനിതാക്രിക്കറ്റില് നിന്നും മറ്റൊരു നേട്ടം കൂടി. ഇന്ത്യന് വനിതാ ടീമിലെ പരിചയ സമ്പന്നയായ കളിക്കാരിയും മുന് നായികയുമായ മിഥാലി രാജ് 10,000 റണ്സ് തികച്ചു. അന്താരാഷ്ട്ര മത്സരത്തില് ഈ നേട്ടം കൊയ്യുന്ന ആദ്യ ഇന്ത്യാക്കാരിയും അന്താരാഷ്ട്ര തലത്തിലെ രണ്ടാമത്തെ താരവുമാണ്. ക്രിക്കറ്റിലെ എല്ലാ ഫോര്മാറ്റിലും കൂടിയാണ് മിഥാലി ഇത്രയും റണ്സ് നേടുന്നത്.
ഇന്ത്യന് ഏകദിന ടീമിന്റെ നായികയായ 38 കാരി ഇംഗഌണ്ടിന്റെ ഷാര്ലറ്റ് എഡ്വാര്ഡ്സിനൊപ്പമാണ് എത്തിയത്. ദക്ഷിണാഫ്രിക്കയ്ക്ക് എതിരേ നടക്കുന്ന ഏകദിനത്തില് 28 ാം ഓവറില് ആനി ബോസ്ക്കിനെ ബൗണ്ടറിക്ക് പറത്തിയാണ് മിഥാലി നേട്ടം കൈവരിച്ചത്. തൊട്ടടുത്ത പന്തില് പുറത്താകുകയും ചെയ്തു. ബോസ്ക്കിനെ ഫ്ളിക്ക് ചെയ്യാനുള്ള ശ്രമത്തില് മിഗ്നോന് ഡു പ്രീസിന് പിടി കൊടുത്തു.
