ചങ്ങരംകുളം(മലപ്പുറം): ഓണ്ലൈന് ഗെയിമിനായി നാലുമാസത്തിനിടെ പതിനൊന്നുകാരന് മൊെബെല് ഫോണ് ചാര്ജ് ചെയ്തത് 28,000 രൂപയ്ക്ക്! വീട്ടില്നിന്നു പണം മോഷ്ടിച്ചുള്ള കുട്ടിയുടെ കളിഭ്രാന്ത് പുറത്തായപ്പോള് ഞെട്ടിയതു രക്ഷിതാക്കള്.
കഴിഞ്ഞ ദിവസം ചങ്ങരംകുളം ആലംകോട്ടെ മൊെബെല് കടയ്ക്കു മുന്നില് അരങ്ങേറിയ നാടകീയ സംഭവങ്ങളാണു പതിനൊന്നുകാരന്റെ കള്ളി വെളിച്ചത്താക്കിയത്. വീട്ടില്നിന്നു നിരന്തരം പണം മോഷണം പോകുന്നതു സംബന്ധിച്ച അന്വേഷണത്തിനൊടുവില് മൊെബെല് റീച്ചാര്ജിങ് രക്ഷിതാക്കളുടെ ശ്രദ്ധയില്പ്പെടുകയായിരുന്നു.
ഇതോടെ സമീപത്തെ കടയിലെത്തി വീട്ടുകാര് വിവരം അന്വേഷിച്ചു. ഇതു വാക്കേറ്റത്തില് കലാശിച്ചതോടെ കടക്കാരനു വീട്ടുകാരുടെ അസഭ്യവര്ഷവും മര്ദനവുമേറ്റു. ബഹളം സംഘര്ഷാവസ്ഥയില് എത്തിയതോടെ ചങ്ങരംകുളം സി.ഐ: സജീവ്, എസ്.ഐ: ആന്റോ, വിജയന് എന്നിവരുടെ നേതൃത്വത്തില് പോലീസെത്തി രംഗം ശാന്തമാക്കി.
ഒന്നര ലക്ഷത്തോളം രൂപ മോഷണം പോയെന്നു വീട്ടുകാര് പറയുന്നു. അന്വേഷണത്തില് പതിനൊന്നുകാരന്റെ നിര്ദേശപ്രകാരം സുഹൃത്തായ മുതിര്ന്ന കുട്ടിയാണു റീച്ചാര്ജ് ചെയ്തിരുന്നതെന്നു വ്യക്തമായി. ആവശ്യമുള്ള പണം പതിനൊന്നുകാരന് വീട്ടില്നിന്ന് മോഷ്ടിച്ചു നല്കും.
മൊെബെലില് ഗെയിം കളിക്കാനാണെന്നും പത്തും പതിനഞ്ചും പേര് ഒരുമിച്ചാണ് വലിയ തുകയ്ക്ക് റീചാര്ജ് ചെയ്യുന്നതെന്നുമാണ് കടയിലെ ജീവനക്കാരനോടു പറഞ്ഞിരുന്നത്. കുട്ടികള് ഇത്തരം കുറ്റകൃത്യങ്ങളില് ഏര്പ്പെടുന്നത് പതിവാണെന്നും രക്ഷിതാക്കള് ജാഗ്രത പുലര്ത്തണമെന്നും പോലീസ് മുന്നറിയിപ്പ് നല്കി.
