കണ്ണൂര് : പാനൂര് മന്സൂര് വധക്കേസിലെ രണ്ടാംപ്രതി ആത്മഹത്യ ചെയ്തതില് സിപിഎമ്മിനെ വിമര്ശിച്ച് ആര്എസ് പി നേതാവ് ഷിബു ബേബി ജോണ്. ഉന്നതരിലേക്ക് അന്വേഷണം എത്താതിരിക്കാനുള്ള ആസൂത്രിതകൊലപാതകങ്ങളാണിതെന്നും, സിപി എം സമ്മര്ദ്ദത്തിലാകുന്ന ഏത് കേസ് എടുത്താലും ഒരു മുഖ്യപ്രതി ആത്മഹത്യ ചെയ്യുകയോ കൊല്ലപ്പെടുകയോ ചെയ്തിട്ടുണ്ടകുമെന്നും ഷിബു ബേബി ജോണ് തന്റെ ഫേസ്ബുക്ക പോസ്റ്റില് കുറിച്ചു.
കെ.ടി ജയകൃഷ്ണന് വധം, ഫസല് വധക്കേസ് തുടങ്ങി ഉദാഹരണങ്ങള് ചൂണ്ടിക്കാട്ടിയാണ് അദ്ദേഹത്തിന്റെ കുറിപ്പ്. പാര്ട്ടിക്ക് വേണ്ട കുറ്റകൃത്യങ്ങള് ചെയ്യുന്നവര് നിങ്ങളുടെ പിന്നിലും പാര്ട്ടിയുടെ കൊലയാളിക്കണ്ണുകള് ഉണ്ടന്ന് ഓര്മ്മിക്കണമെന്നും ഷിബുബേബി ജോണ് മുന്നറിയിപ്പ് നല്കി. അദ്ദേഹത്തിന്റെ കുറിപ്പ് വായിക്കാം
കണ്ണൂരില് ലീഗ് പ്രവര്ത്തകന് മന്സൂറിനെ കൊലപ്പെടുത്തിയ കേസിലെ പ്രതി ആത്മഹത്യ ചെയ്ത സംഭവത്തില് ദുരൂഹത വര്ദ്ധിക്കുകയാണ്. അടുത്ത കാലത്തായി സി.പി.എം സമ്മര്ദ്ദത്തിലാകുന്ന ഏത് കേസ് എടുത്താലും അതിലേ ഒരു മുഖ്യ പ്രതി ആത്മഹത്യ ചെയ്യുകയോ കൊല്ലപ്പെടുകയോ ചെയ്തിട്ടുണ്ടാകും അതെങ്ങനെ സംഭവിക്കുന്നു...?
കെ.ടി ജയകൃഷ്ണന് മാസ്റ്റര് വധക്കേസ്: ഒരു പ്രതി കൊല്ലപ്പെട്ടു, ശുക്കൂര് വധക്കേസ് : ഒരു പ്രതി ആത്മഹത്യ ചെയ്തു, ഫസല് വധക്കേസ് : മൂന്ന് പ്രതികള് കൊല്ലപ്പെട്ടു, വാളയാര് ഇരട്ട കൊല : ഒരു പ്രതി ആത്മഹത്യ ചെയ്തു, മന്സൂര് വധക്കേസ് : ഒരു പ്രതി ആത്മഹത്യ ചെയ്തു.
സ്വന്തം അയല്ക്കാരനെയും സുഹൃത്തിനെയും പോലും ബോംബെറിഞ്ഞും ക്രൂരമായി വെട്ടിയും കുത്തിയും കൊല്ലാന് ഒരു മടിയും ഇല്ലാത്തവര് ആത്മഹത്യ ചെയ്യാന് മാത്രം മനസ്സിന് ബലമില്ലാത്തവരാണെന്ന് വിശ്വസിക്കാന് ആര്ക്ക് കഴിയും? ഉന്നതങ്ങളിലേക്ക് അന്വേഷണം എത്തപ്പെടാതിരിക്കാനുള്ള ആസൂത്രിത കൊലപാതകങ്ങള് ആണിതെല്ലാമെല്ലാം എന്ന് ആരെങ്കിലും സംശയിച്ചാല് അവരെ കുറ്റം പറയാനാകുമോ? പാര്ട്ടിയ്ക്ക് വേണ്ടി ക്വട്ടേഷന് ഏറ്റെടുക്കുന്നവരെ, നിങ്ങള്ക്ക് പിന്നിലും പാര്ട്ടിയുടെ കൊലയാളിക്കണ്ണുകള് കാത്തിരിപ്പുണ്ടെന്ന് ഓര്ക്കുക.
