തിരുവനന്തപുരം: ഹരിത ട്രിബ്യൂണല് വിധിയുടെ അടിസ്ഥാനത്തിൽ അമിതമായി പുക പുറത്തു വിടുന്ന വാഹനങ്ങള് പിടികൂടാന് മോട്ടോര്വാഹനവകുപ്പ്
പ്രത്യേക പരിശോധനയ്ക്ക് തയ്യാറെടുക്കുന്നതായി റിപ്പോര്ട്ട്.
ഈ മാസം 15 മുതല് 30 വരെ ഇതിനായി പ്രത്യേക പരിശോധന നടത്താനാണ് നീക്കം. മലിനീകരണ നിയന്ത്രണ വ്യവസ്ഥകള് പാലിക്കാത്ത വാഹനങ്ങള്ക്കെതിരേ കര്ശന നടപടി സ്വീകരിക്കാന് ഹരിത ട്രിബ്യൂണല് നിര്ദേശിച്ചിരുന്നു. ഇതിന്റെ അടിസ്ഥാനത്തിലാണ് നടപടി.
ഇതിനിടെ സംസ്ഥാനത്തെ പുകപരിശോധനാകേന്ദ്രങ്ങള് ഓണ്ലൈനാക്കുന്ന നടപടികള് അന്തിമഘട്ടത്തിൽ എത്തിയിരിക്കുകയാണ്. പുകപരിശോധനാകേന്ദ്രങ്ങള് നല്കുന്ന സര്ട്ടിഫിക്കറ്റിന്റെ വിവരങ്ങള് മോട്ടോര്വാഹനവകുപ്പിനും പോലീസിനും ഓണ്ലൈനില് ലഭിക്കും. ഓണ്ലൈന് പരിശോധനാ ഫലം നേരിട്ട് വാഹന് വെബ്സൈറ്റിലേക്ക് ചേര്ക്കും.
പുതിയ ഓണ്ലൈന് സംവിധാനത്തിലൂടെ സര്ട്ടിഫിക്കറ്റുകളുടെ സാധുത ഓണ്ലൈനിലൂടെ ഉദ്യോഗസ്ഥര്ക്ക് ഉറപ്പുവരുത്താന് സാധിക്കും.
വാഹന പരിശോധനാ സമയങ്ങളില് ഡിജിറ്റല് പകര്പ്പ് മതി. അതിനാല് വാഹനം തടഞ്ഞുനിര്ത്തി പരിശോധിക്കാതെ ഓണ്ലൈനില് പിഴ ചുമത്താനാകും.
