എപ്പോഴും എന്തിനാണ് നല്ല സിനിമകള് മാത്രം ചെയ്യുന്നതെന്നും വല്ലപ്പോഴും ഞങ്ങളെപ്പോലെ മോശം ചിത്രവും ചെയ്തു കൂടെയെന്നും ജോജിയെ പുകഴ്ത്തി ബോളിവുഡ് താരം ഗജ്രാജ് റാവു. ബോളിവുഡ് സിനിമകളെ പരിഹസിച്ചാണ് റാവു ദിലീഷ് പോത്തന് - ശ്യാം പുഷ്ക്കരന് - ഫഹദ് ടീമിന്റെ പുതിയ സിനിമ ജോജിയെ പുകഴ്ത്തിയത്. വല്ലപ്പോഴും മറ്റ് ഭാഷകളില് നിന്നോ അല്ലെങ്കില് ഞങ്ങളുടെ ബോളിവുഡില് നിന്നോ കുറച്ചു മോശം സിനിമകള് ഉണ്ടാക്കാന് കൂടി നിങ്ങള് അറിയേണ്ടതുണ്ടെന്നായിരുന്നു ഗജ്രാജ് റാവു ഇന്സ്റ്റാഗ്രാമില് ജോജിയുടെ ടീസര് പങ്കുവെച്ച് നടത്തിയ പരിഹാസം.
മാര്ക്കറ്റിങ് കാമ്പയിനുകളോ പ്രമോഷനുകളോ, ബോക്സോഫീസ് ഭ്രമമോ നിങ്ങള്ക്കില്ലാത്തത് എന്താണെന്നും എന്തുകൊണ്ടാണ് ഗുണമില്ലാത്ത റീമേക്ക് സിനിമകള് ചെയ്യാത്തത് എന്നും ചോദിച്ചിട്ടുണ്ട്. പുതുമയുള്ള കഥ എഴുതി അത് നല്ല ചിത്രമാക്കി മാറ്റുന്ന ദിലീഷ് പോത്തനും ഫഹദ് ഫാസില് ആന്ഡ് ഫ്രണ്ട്സും ഇനിയും ഇത് തുടരരുതെന്നാണ് റാവു തമാശയായി പറഞ്ഞിരിക്കുന്നത്.
ഇത്തരം നല്ല സിനിമകള് തുടര്ന്നും ചെയ്യാന് സാധിക്കട്ടെയെന്നും, കോവിഡ് ഒഴിഞ്ഞുള്ള കാലത്ത് നിങ്ങളുടെ സിനിമയുടെ ഫസ്റ്റ് ഡേ ഷോക്കായി താന് ഒരുങ്ങിയിരിക്കുകയാണെന്നും ഗജ്രാജ് റാവു പറഞ്ഞു. ഈ മാസം ആദ്യമായിരുന്നു ഫഹദിന്റെ ജോജി ആമസോണില് എത്തിയത്. സിനിമയെ അനുകൂലിച്ചും പ്രതികൂലിച്ചും അഭിപ്രായങ്ങള് ഏറുന്നതിനിടയിലാണ് ബോളിവുഡ് നടനും സിനിമയെ അഭിനന്ദിച്ച് രംഗത്ത് വന്നത്.
