ഹരിയാന : ആശുപത്രിയിൽ നിന്ന് കോവിഡ് വാക്സിൻ അടങ്ങിയ ബാഗ് മോഷ്ടിച്ച കള്ളൻ തിരികെ നൽകി. 1700 ഡോസ് വാക്സീനടങ്ങിയ ബാഗുമായാണ് ഇയാൾ കടന്നു കളഞ്ഞത്. ഹരിയാനയിലെ ജിന്തിലാണ് സംഭവം.
എന്നാൽ, ബാഗിൽ വാക്സിനാണെന്നു അറിഞ്ഞതോടെ ക്ഷമാപണം നടത്തി ബാഗ് തിരികെ ഏൽപിക്കുകയായിരുന്നു. ബാഗ് തുറന്നപ്പോഴാണ് വാക്സീനാണെന്ന് തിരിച്ചറിഞ്ഞത്. ഒടുക്കം മനംമാറ്റമുണ്ടായ കള്ളൻ ഹിന്ദിയിൽ കുറിപ്പു തയ്യാറാക്കി സിവിൽ പോലീസ് സ്റ്റേഷന് സമീപം ബാഗ് എത്തിക്കുകയായിരുന്നു.
സ്റ്റേഷന് പുറത്തുള്ള ചായക്കടക്കാരനെയാണ് ഇയാൾ ബാഗ് ഏൽപ്പിച്ചത്.
പൊലീസുകാർക്കുള്ള ഭക്ഷണമാണ് ഉള്ളിലെന്നും അത്യാവശ്യമുള്ളതിനാൽ വെറെ സ്ഥലത്ത് ഡെലിവറിക്ക് പോവുകയാണെന്നുമാണ് കടക്കാരനോട് ഇയാൾ പറഞ്ഞത്. അതെ സമയം മോഷ്ടാവിനെ പിടികൂടുന്നതിനായി അന്വേഷണം ശക്തമാക്കിയതായി പൊലീസ് അറിയിച്ചു.
