വയനാട്: വയനാട്ടിൽ കോവിഡ് രോഗിയായ ആൾ ക്വാറന്റീൻ ലംഘിച്ചതിന് കേസ് എടുത്തു. ഭാര്യയെ ഡ്രൈവിങ് പഠിപ്പിക്കാനായി പുറത്തിറങ്ങിയ കോവിഡ് രോഗിയെയാണ് പൊലീസ് കയ്യോടെ പൊക്കിയത്ന. വയനാട് പനമരത്തിലാണ് സംഭവം. കേണിച്ചിറ താഴെമുണ്ട സ്വദേശിക്കെതിരെയാണ് പൊലീസ് കേസെടുത്തത്.
കോവിഡ് പോസിറ്റീവായവർ പ്രോട്ടോക്കോൾ പാലിക്കുന്നുണ്ടോയെന്ന് നിരീക്ഷിക്കുന്നതിന്റെ ഭാഗമായി പൊലീസ് എത്തിയപ്പോഴാണ് ഇയാൾ പുറത്തു പോയ വിവരം അറിഞ്ഞത്. ബന്ധുക്കളോട് അന്വേഷിച്ചെങ്കിലും മറുപടി തൃപ്തികരമായിരുന്നില്ല. തുടർന്ന് രോഗിയെ നേരിട്ട് വിളിച്ചപ്പോൾ കോവിഡ് പരിശോധനയ്ക്കു പുറത്തുപോയിരിക്കുകയാണെന്നായിരുന്നു മറുപടി.
സംശയം തോന്നിയ പൊലീസ് നടത്തിയ തിരച്ചിലിലാണു പൊതുനിരത്തിൽ ഭാര്യയെ ഡ്രൈവിങ് പഠിപ്പിക്കുന്നതു കണ്ടെത്തിയത്. ലോക്ഡൗൺ ലംഘിച്ചതിനടക്കം ഇയാൾക്കെതിരെ പൊലീസ് കേസ് എടുത്തു.
