ന്യൂഡല്ഹി : കോണ്ഗ്രസിനെതിരായ വ്യാജ ടൂള്കിറ്റ് ആരോപണത്തില് ബി.ജെ.പി ദേശീയ വക്താവ് സംപിത് പത്രയ്ക്കെതിരെ ഛത്തീസ്ഗഡ് പൊലീസ് സമന്സ് അയച്ചു. വൈകുന്നേരം 4 ന് റായ്പൂര് സിവില് ലൈന് പൊലീസ് സ്റ്റേഷനില് ഹാജരാകാന് ആവശ്യപ്പെട്ടാണ് നോട്ടീസ്. ഓണ്ലൈന് ആയോ നേരിട്ടോ ഹാജരാകണമെന്നാണ് സംപിത് പത്രയോട് ആവശ്യപ്പെട്ടിരിക്കുന്നത്.
പ്രധാനമന്ത്രി നരേന്ദ്ര മോദിയുടെ പ്രതിച്ഛായ മോശമാക്കാന് കോണ്ഗ്രസ് ടൂള്കിറ്റുണ്ടാക്കിയെന്ന സാംപിത് പാത്രയുടെ ആരോപണം വ്യാജമെന്ന് ട്വിറ്റര് കണ്ടെത്തിയിരുന്നു. പ്രസ്താവന വ്യാജമായി നിര്മിച്ചതാണെന്ന് നിരവധി ഫാക്ട് ചെക്ക് വെബ്സൈറ്റുകളും നേരത്തെ കണ്ടെത്തിയിരുന്നു. സംപിത് പത്രയ്ക്കും മുന് ഛത്തീസ്ഗഡ് മന്ത്രി രമണ് സിംഗിനുമെതിരെയാണ് പരാതി. കോണ്ഗ്രസിന്റെ വ്യാജ ലെറ്റര്ഹെഡില് നിന്ന് തെറ്റായ വിവരങ്ങള് പങ്കുവെച്ചുവെന്നാണ് കേസ്. വിദ്യാര്ത്ഥി സംഘടന എന്.എസ്.യു.ഐ ആണ് പരാതി നല്കിയത്.
കൊവിഡ് കൈകാര്യം ചെയ്യുന്നതില് മോദി സര്ക്കാരിന്റെ തോല്വി മറച്ചുവെച്ച് ജനങ്ങളുടെ ശ്രദ്ധ തിരിക്കുന്നതിന് വേണ്ടിയാണ് ഇത്തരം വ്യാജ വിവരങ്ങള് പങ്കുവെക്കുന്നതെന്നും പരാതിയില് പറയുന്നു.
