കൊവിഡ് 19 രണ്ടാം തരംഗത്തിന് എതിരെയുള്ള പോരാട്ടത്തിന് കര്ണാടകയ്ക്ക് പിന്തുണയേകി സാംസംഗ് ഇന്ത്യ. ഇതിന്റെ ഭാഗമായി സംസ്ഥാനത്തിന് 14,000 മെഡിക്കല് കിറ്റുകളും 24 ഓക്സിജന് കോണ്സന്ട്രേറ്ററുകളും 150 ഓക്സിജന് സിലിണ്ടറുകളും സാംസംഗ് ഇന്ത്യ സംഭാവനയായി നല്കി. വീടുകളില് ഐസൊലേഷനില് കഴിയുന്ന കൊവിഡ് രോഗികള്ക്ക് ഉപയോഗിക്കാനാണ് മെഡിക്കല് കിറ്റുകള് കൈമാറിയത്. സാംസംഗ് ആര് ആന്ഡ് ഡി ഇന്സ്റ്റിറ്റ്യൂട്ട് ബാംഗ്ലൂര്, ശ്രീമദ് രാജ്ചന്ദ്ര സര്വമംഗള് ട്രസ്റ്റ് എന്നിവയുമായി സഹകരിച്ചാണ് കര്ണാടക സര്ക്കാരിന് മെഡിക്കല് കിറ്റുകള് നല്കിയത്.
ചാരിറ്റബിള് ആശുപത്രികള്ക്കാണ് ഇതിലെ പതിനാല് ഓക്സിജന് കോണ്സന്ട്രേറ്ററുകള് സംഭാവനയായി നല്കിയത്. റിപ്പോർട്ട് പ്രകാരം ദക്ഷിണ കൊറിയയില് നിന്ന് വിമാനമാര്ഗം എത്തിച്ച ഓക്സിജന് കോണ്സന്ട്രേറ്ററുകള് സമൂഹത്തിലെ ദുര്ബല വിഭാഗങ്ങളില്പ്പെട്ട രോഗികളായിരിക്കും ഉപയോഗിക്കുന്നത്. പത്ത് ഓക്സിജന് കോണ്സന്ട്രേറ്ററുകള് കൂടി കര്ണാടക സര്ക്കാരിന് കൈമാറി.
നേരത്തെ കൊവിഡിനെതിരായ ഇന്ത്യയുടെ പോരാട്ടത്തിന് സാംസംഗ് അഞ്ച് മില്യണ് യുഎസ് ഡോളര് (37 കോടി രൂപ) വാഗ്ദാനം ചെയ്തിരുന്നു. ഈ തുക കേന്ദ്ര, സംസ്ഥാന സര്ക്കാരുകള്ക്ക് സംഭാവനകള് നല്കും. ആശുപത്രികള്ക്ക് 100 ഓക്സിജന് കോണ്സന്ട്രേറ്ററുകള്, 3000 ഓക്സിജന് സിലിണ്ടറുകള്, ഒരു മില്യണ് എല്ഡിഎസ് സിറിഞ്ചുകള് എന്നിവ ഉള്പ്പെടെ അത്യാവശ്യമായ മെഡിക്കല് സാമഗ്രികള് നല്കും.മാത്രമല്ല, ഇന്ത്യയിലെ 50,000 ലധികം സാംസംഗ് ജീവനക്കാര്ക്കും ഗുണഭോക്താക്കള്ക്കുമുള്ള വാക്സിനേഷന് ചെലവ് വഹിക്കുമെന്ന് കമ്പനി പ്രഖ്യാപിച്ചതായി ആണ് സൂചന.
