ഹൈദരാബാദ്: റഷ്യയില് നിന്നുള്ള സ്പുട്നിക് V വാക്സിൻ ഇന്ത്യയിലെത്തി. ഇന്ന് പുലര്ച്ചെ 3.43 ഓടെ 56.6 ടണ്ണോളം വരുന്ന 30 ലക്ഷം ഡോസാണ് ഹൈദരാബാദില് എത്തിയത്. രാജ്യത്തേക്കുള്ള കോവിഡ് വാക്സിനുകളുടെ ഏറ്റവും വിലയ ഇറക്കുമതിയാണിത്.
സ്പുട്നിക് V വാക്സിനുകള് പ്രത്യേക രീതിയില് കൈകാര്യം ചെയ്യുകയും സംഭരിക്കലും ആവശ്യമാണ്. 20 ഡിഗ്രി സെല്ഷ്യസിലാണ് വാക്സിന് സൂക്ഷിക്കുകയെന്നാണ് അധികൃതര് പറയുന്നത്. വാക്സിനുകളുടെ ഇറക്കുമതിയും കയറ്റി അയക്കലും സുഗമമായ നടത്തുന്നതിന് ആവശ്യമായ എല്ലാ സൗകര്യങ്ങളും സജ്ജമാക്കിയിട്ടുണ്ടെന്ന് ഹൈദരാബാദ് വിമാനത്താവള അധികൃതര് വ്യക്തമാക്കി.
സിറം ഇന്സ്റ്റിറ്റ്യൂട്ടിന്റെ കോവിഷീല്ഡിനും ഭാരത് ബയോടെകിന്റെ കോവാക്സിനും ശേഷം ഇന്ത്യയില് ആദ്യമായി വിതരണം ചെയ്യാന് അനുമതി ലഭിച്ചത് സ്പുട്നിക് വാക്സിനാണ്. വാക്സിന് ക്ഷാമം രാജ്യത്തെ വിവിധ സംസ്ഥാനങ്ങളില് വാക്സിനേഷന് പദ്ധതികള് അവതാളത്തിലായിട്ടുണ്ട്. കൂടുതല് വാക്സിനുകളാവശ്യപ്പെട്ട് സംസ്ഥാനങ്ങള് നിരന്തരം കേന്ദ്ര സര്ക്കാരിനെ സമീപിച്ചുകൊണ്ടിരിക്കുകയാണ്.
