ഫാമിലിമെന് 2 ലെ കഥപാത്രം ഈഴം യുദ്ധത്തില് ജീവന് നഷ്ടപ്പെട്ട സ്ത്രീകള്ക്കുള്ള ആദരവെന്ന് നടി സാമന്ത അക്കിനേനി. ട്രെയിലര് റിലീസ് ചെയ്തപ്പോള് മുതല് തുടങ്ങിയ വിവാദത്തില് ഇതാദ്യമായിട്ടാണ് നടി മറുപടി പറയുന്നത്. വെബ് സീരീസില് താരത്തിന്റെ വേഷത്തിന് പ്രശംസ എത്താന് തുടങ്ങിയതോടെയാണ് നടി നിശബ്ദത ഭഞ്ജിച്ച് രംഗത്ത് വന്നിരിക്കുന്നത്.
രണ്ടാഴ്ച മുമ്പ് ട്രെയിലര് തന്റെ ഇന്സ്റ്റാഗ്രാമില് ഷെയര് ചെയ്ത താരം സിനിമയുമായി ബന്ധപ്പെട്ട കമന്റുകളും നിരൂപണങ്ങളും വായിക്കുമ്പോള് തന്റെ ഹൃദയം സന്തോഷം കൊണ്ടു നിറയുകയാണെന്നും വെബ്സീരീസിലെ തന്റെ കഥാപാത്രമായ രാജി എക്കാലത്തും പ്രത്യേകതകള് ഉള്ളതാണെന്നും നടി പറയുന്നു. സിനിമയില് എല്ടിടിഇ യുടെ വനിതാ പോരാളിയായിട്ടാണ് സാമന്ത എത്തുന്നത്. അതുകൊണ്ടു തന്നെ വെബ് സീരീസിനെതിരേയും നടിക്കെതിരേയും വലിയ പ്രതിഷേധവും തമിഴ്നാട്ടില് നിന്നും ഉയര്ന്നിരുന്നു.
എല്ടിടിഇ യെ തീവ്രവാദി സംഘടനയായി സിനിമയില് അവതരിപ്പിക്കുന്നതായിരുന്നു പ്രതിഷേധത്തിന് കാരാണം. സാമന്ത കഥാപാത്രത്തില് അഭിനയിക്കുന്നതില് നിന്നും മാറി നില്ക്കണമെന്നും നടിയെ സൂപ്പര്നായികയാക്കി ഉയര്ത്തിയത് തമിഴ്ജനതയാണെന്നും അവരുടെ വികാരങ്ങളെ വൃണപ്പെടുത്തരുതെന്നും ആള്ക്കാര് സാമൂഹ്യമാധ്യമങ്ങളിലൂടെ പ്രതികരിച്ചിരുന്നു. എന്നാല് നടി ഇതിനൊന്നും ഇതുവരെ മറുപടി പറഞ്ഞിരുന്നില്ല. എന്നാല് സീരിസിനെക്കുറിച്ചുള്ള അഭിപ്രായങ്ങള് വന്നു തുടങ്ങിയതോടെ നടി രംഗത്ത് വന്നു.
രാജും ഡികെയുമായും നില്ക്കുന്ന ഒരു ഫോട്ടോയോടെയാണ് നടിയുടെ പ്രതികരണം. സിനിമയുടെ സംവിധായകനും എഴുത്തുകാരനും കഥാപാത്രവുമായി തന്നെ സമീപിച്ചപ്പോള് തന്നെ കഥാപാത്രത്തിന്റെ ഉള്ക്കാമ്പ് തിരിച്ചറിയുകയും ഒരിക്കലും നഷ്ടപ്പെടുത്തരുതാത്തതാണെന്നും തിരിച്ചറിഞ്ഞതായി താരം പറയുന്നു. തമിഴ്പുലികളായ സ്ത്രീകളുടെ പോരാട്ടത്തിന്റെ ഡോക്യുമെന്ററികള് കണ്ടപ്പോള് താന് ഞെട്ടിപ്പോയെന്നും താരം പറഞ്ഞു. ഇത്തരം വീഡിയോകള് ഏതാനും പ്രേക്ഷകര് മാത്രമാണ് കണ്ടിട്ടുള്ളത്. ആയിരക്കണക്കിന് ഈഴം ജനതയുടെ ജീവന് പൊലിഞ്ഞു, ല ക്ഷക്കണക്കിന് ആള്ക്കാരുടെ വീടുകളും ഉപജീവനവും നഷ്ടമായി. ഇപ്പോഴും അനേകര് ഭൂമിയും വീടുമില്ലാതെ ആഭ്യന്തരയുദ്ധത്തിന്റെ മുറിവുകള് പേറി ജീവിക്കുന്നു.
സിനിമയിലെ രാജി എന്ന കഥാപാത്രം ഒരുപക്ഷേ സാങ്കല്പ്പികമായിരിക്കാം. എന്നാല് അസാധാരണ യുദ്ധത്തില് പങ്കെടുത്ത ഇപ്പോഴും യുദ്ധത്തിന്റെ വേദനിപ്പിക്കുന്ന ഓര്മ്മകളും പേറി ജീവിക്കുന്ന അനേകം സ്ത്രീകള്ക്കുള്ള ആദരമാണ് അത്. വിദ്വേഷത്തിനും അടിച്ചമര്ത്തലിനും സ്വാര്ത്ഥതയ്ക്കും എതിരേ മനുഷ്യര് ഒരുമിച്ച് ചേര്ന്ന് നടത്തിയ പ്രതികരണത്തിന്റെ എക്കാലത്തും ഓര്ത്തിരിക്കുന്ന ഒരു കഥാപാത്രമാണ് അതെന്നും താരം പറയുന്നു. വെള്ളിയാഴ്ചയാണ് സീരീസ് ആമസോണ് പ്രൈമില് പ്രദര്ശനത്തിന് എത്തിയത്. ഒമ്പത് എപ്പിസോഡുള്ള സീരീസില് നായകന് മനോജ് ബാജ്പേയിയാണ്.
