ടാറ്റ നെക്സോണ് സബ്കോംപാക്റ്റ് എസ്യുവിയുടെ നാല് ഡീസല് വേരിയന്റുകള് നിര്ത്തിയതായി റിപ്പോർട്ട്. എക്സ്ഇ, എക്സ്സെഡ്, എക്സ്എംഎ, എക്സ്സെഡ്എ പ്ലസ് (എസ്) എന്നീ വേരിയന്റുകളുടെ വില്പ്പനയാണ് അവസാനിപ്പിച്ചത്. നെക്സോണ് ഉപയോക്താക്കളുടെ ചോയ്സുകള് ലളിതമാക്കുന്നതിനാണ് ചില ഡീസല് വേരിയന്റുകള് നിർത്തിയതെന്ന് ടാറ്റ മോട്ടോഴ്സ് പത്രക്കുറിപ്പില് അറിയിച്ചു. അടുത്തിടെ നെക്സോണ് ഡീസല് വേരിയന്റുകള് നിര്ത്തുന്നതായി സാമൂഹ്യ മാധ്യമങ്ങളില് പ്രചരിച്ചിരുന്നു. ഇതിന് മറുപടിയായി ടാറ്റ മോട്ടോഴ്സ് ഔദ്യോഗിക പ്രസ്താവന പുറത്തിറക്കുകയായിരുന്നു.
എക്സ്ഇ നിർത്തലാക്കിയതോടെ എക്സ്എം വേരിയന്റാണ് ഇപ്പോള് ബേസ് ഡീസല് വേരിയന്റ്. എക്സ്സെഡ്എ പ്ലസ് ഡിടി(ഒ) ടോപ് ഡീസല് വേരിയന്റ് ആകും. ടാറ്റ നെക്സോണ് ഇപ്പോള് 12 പെട്രോള് വേരിയന്റുകളിലും എട്ട് ഡീസല് വേരിയന്റുകളിലും ലഭിക്കും. മുമ്ബ് നെക്സോണ് എസ്യുവിയുടെ ‘ടെക്ടോണിക് ബ്ലൂ’ കളര് ഓപ്ഷന് നിര്ത്തിയിരുന്നു. കൂടാതെ, പുതിയ 5 സ്പോക്ക് ഡയമണ്ട് കട്ട് അലോയ് വീലുകള് അവതരിപ്പിച്ചിരുന്നു.
ഗ്ലോബല് എന്കാപ് നടത്തിയ ഇടി പരിശോധനയില് 5 സ്റ്റാര് റേറ്റിംഗ് നേടിയ ഇന്ത്യയിലെ ആദ്യ കാറാണ് ടാറ്റ നെക്സോണ്. ടാറ്റ നെക്സോണ് ഇപ്പോൾ 1.2 ലിറ്റര് റെവോട്രോണ് പെട്രോള്, 1.5 ലിറ്റര് റെവോടോര്ക്ക് ഡീസല് എന്നീ രണ്ട് എന്ജിന് ഓപ്ഷനുകളിലാണ് ലഭിക്കുന്നത്. ടര്ബോ പെട്രോള് എന്ജിന് 118 ബിഎച്ച്പി കരുത്തും 170 എന്എം ടോര്ക്കുമാണ് പരമാവധി ഉല്പ്പാദിപ്പിക്കുന്നത്. 108 ബിഎച്ച്പി കരുത്തും 260 എന്എം ടോര്ക്കുമാണ് ഡീസല് മോട്ടോര് പരമാവധി പുറപ്പെടുവിക്കുന്നത്. 6 സ്പീഡ് മാന്വല്, 6 സ്പീഡ് എഎംടി എന്നിവയാണ് ട്രാന്സ്മിഷന് ഓപ്ഷനുകള്.
