2021 സിഎഫ് മോട്ടോ 300എന്കെ മോട്ടോര്സൈക്കിളിന്റെ ഡെലിവറി ഇന്ത്യയില് ആരംഭിച്ചു. 2.29 ലക്ഷം രൂപയാണ് നേക്കഡ് മോട്ടോര്സൈക്കിളിന്റെ എക്സ് ഷോറൂം വില. ചൈനീസ് മോട്ടോര്സൈക്കിള് നിര്മാതാക്കള് ഈ വര്ഷം മാര്ച്ചിലാണ് ആദ്യ ബിഎസ് 6 മോഡല് അവതരിപ്പിച്ചത്. ബിഎംഡബ്ല്യു ജി 310 ആര്, കെടിഎം 250 ഡ്യൂക്ക്, ടിവിഎസ് അപ്പാച്ചെ ആര്ആര് 310 എന്നീ മോഡലുകളാണ് ഇന്ത്യയിലെ എതിരാളികള്.
നേക്കഡ് സ്ട്രീറ്റ്ഫൈറ്ററില് കാര്യമായ മാറ്റങ്ങളൊന്നും ലഭിക്കുന്നില്ല. ഡിജിറ്റല് ഇന്സ്ട്രുമെന്റ് ക്ലസ്റ്റര്, ഫുള് എല്ഇഡി ഹെഡ്ലാംപ്, മസ്കുലര് ഇന്ധന ടാങ്ക്, മുകളിലേക്ക് ഉയര്ന്ന പിന്ഭാഗം, അണ്ടര്ബെല്ലി എക്സോസ്റ്റ്, പിറകില് ഫെന്ഡറില് ഘടിപ്പിച്ച നമ്പര് പ്ലേറ്റ്, സ്പ്ലിറ്റ് സീറ്റ് സംവിധാനം, 5 സ്പോക്ക് അലോയ് വീലുകള് എന്നിവ അതേപോലെ തുടരുന്നു.
സസ്പെന്ഷന് നിര്വഹിക്കാൻ മുന്നില് അപ്സൈഡ് ഡൗണ് (യുഎസ്ഡി) ടെലിസ്കോപിക് ഫോര്ക്കുകള്, പിന്നില് മോണോഷോക്ക് എന്നിവ നൽകി. മുന്, പിന് ചക്രങ്ങളില് ഡിസ്ക് ബ്രേക്ക് നല്കി. ഡുവല് ചാനല് എബിഎസ് സ്റ്റാന്ഡേഡ് സുരക്ഷാ ഫീച്ചറാണ്. രണ്ട് വര്ഷം മുമ്പാണ് 250 സിസി മുതല് 650 സിസി സെഗ്മെന്റുകളിലെ മോഡലുകളുമായി ചൈനീസ് വാഹന നിര്മാതാക്കളായ സിഎഫ്മോട്ടോ ഇന്ത്യന് വിപണിയില് പ്രവേശിച്ചത്.
