ഫെബ്രുവരിയിൽ ചൈനീസ് സ്മാർട്ട്ഫോൺ നിർമാതാക്കളായ റിയൽമി വില്പനക്കെത്തിച്ച നാർസോ 30 ശ്രേണിയിൽ പുത്തൻ ഫോണുകൾ അവതരിപ്പിച്ചു. നാർസോ 30 4ജി എന്ന അടിസ്ഥാന മോഡലും നാർസോ 30 5ജി പതിപ്പുമാണ് ഇപ്പോൾ വില്പനക്കെത്തിയിരിക്കുന്നത്.
റിയൽമി നാർസോ 30 4ജി മോഡൽ 4 ജിബി റാം + 64 ജിബി സ്റ്റോറേജ് പതിപ്പിലും 6 ജിബി റാം + 128 ജിബി സ്റ്റോറേജ് പതിപ്പിലും വില്പനക്കെത്തിയിരിക്കുന്നു. ഫോണുകൾക്ക് യഥാക്രമം 12,499 രൂപയും, 14,499 രൂപയുമാണ് വില. 500 രൂപയുടെ ആദ്യ ദിന ഡിസ്കൗണ്ട് സഹിതം റിയൽമി നാർസോ 30 4ജി സ്മാർട്ട്ഫോൺ ഫ്ലിപ്കാർട്ട്, റിയൽമി.കോം വെബ്സൈറ്റുകളിലൂടെ ഈ മാസം 29ന് വില്പനക്കെത്തും. നാർസോ 30 5ജി 6 ജിബി റാം + 128 ജിബി സ്റ്റോറേജ് പതിപ്പിൽ മാത്രം ആണ് എത്തുന്നത്. 15,999 രൂപയാണ് വില. റിപ്പോർട്ട് പ്രകാരം ഈ മാസം 30നാണ് 500 രൂപയുടെ ആദ്യ ദിന ഡിസ്കൗണ്ട് സഹിതം നാർസോ 30 5ജി പതിപ്പിന്റെ വില്പന ആരംഭിക്കുക. റേസിംഗ് ബ്ലൂ, റേസിംഗ് സിൽവർ എന്നീ നിറങ്ങളിലാണ് നാർസോ 30 4ജി, 5ജി ഫോണുകൾ വില്പനക്കെത്തിയിരിക്കുന്നത്.
ആൻഡ്രോയിഡ് 11 അടിസ്ഥാനമായ റിയൽമി യുഐ 2.0 ഓപ്പറേറ്റിംഗ് സിസ്റ്റത്തിലാണ് ഡ്യുവൽ സിം (നാനോ) ഫോണായ നാർസോ 30 4ജി, 5ജി പതിപ്പുകൾ പ്രവർത്തിക്കുന്നത്. 6.5 ഇഞ്ച് ഫുൾ എച്ച്ഡി + (1,080x2,400 പിക്സൽ) ഡിസ്പ്ലേ ആണ് നാർസോ 30 4ജിയ്ക്ക്. 20:9 ആസ്പെക്ട് റേഷ്യോയും, 90.5 ശതമാനം സ്ക്രീൻ-ടു-ബോഡി അനുപാതവും 405 പിപി പിക്സൽ ഡെൻസിറ്റി, 580 നിറ്റ് പീക്ക് ബ്രൈറ്റ്നെസ്സ് എന്നിവ ഡിസ്പ്ലേയ്ക്കുണ്ട്. ഇതേ ഡിസ്പ്ലേയാണ് 5ജി പതിപ്പെങ്കിലും 600 നിറ്റ് പീക്ക് ബ്രൈറ്റ്നെസുണ്ട്. നാർസോ 30 4ജി പതിപ്പിന് 6 ജിബി എൽപിഡിഡിആർ 4 എക്സ് റാം വരെ ചേർന്ന് പ്രവർത്തിക്കുന്ന മീഡിയടെക് ഹീലിയോ G95 SoC പ്രോസസ്സർ ആണ് ലഭിക്കുന്നത്. അതെ സമയം 5ജി പ്രവർത്തിക്കുന്നത് മീഡിയടെക് ഡൈമെൻസിറ്റി 700 SoC പ്രൊസസ്സറിലാണ്. ഇരു പതിപ്പുകളുടെയും 128 ജിബി വരെയുള്ള ഇന്റെർണൽ മെമ്മറി മൈക്രോ എസ്ഡി കാർഡ് വഴി 1 ടിബി വരെ ഉയർത്താം.
റിയൽമി നാർസോ 30 4ജിയിൽ 30W ഡാർട്ട് ചാർജ് ഫാസ്റ്റ് ചാർജിംഗ് സപ്പോർട്ടുള്ള 5,000mAh ബാറ്ററി നൽകി. 18W ക്വിക്ക് ചാർജിനെ പിന്തുണയ്ക്കുന്ന റിയൽമി നാർസോ 30 5ജിയിൽ 5,000 എംഎഎച്ച് ബാറ്ററിയാണ് ഉള്ളത്. എഫ് / 1.8 ലെൻസുള്ള 48 മെഗാപിക്സൽ പ്രൈമറി സെൻസറും, എഫ് / 2.4 പോർട്രെയിറ്റ് ലെൻസുള്ള 2 മെഗാപിക്സൽ മോണോക്രോം സെൻസറും എഫ് / 2.4 മാക്രോ ലെൻസ് ഉൾപ്പെടുന്ന ട്രിപ്പിൾ ക്യാമറ സംവിധാനമാണ് നാർസോ 30 4ജി, 5ജി പതിപ്പുകൾക്ക്. സെൽഫികൾക്കും വീഡിയോ ചാറ്റുകൾക്കുമായി, മുൻവശത്ത് 16 മെഗാപിക്സൽ ക്യാമറ സെൻസർ ഉണ്ട്.
