മുംബൈ: ബോളിവുഡിലെ മുതിര്ന്ന സൂപ്പര്താരം അമിതാഭ് ബച്ചന് ഉള്പ്പെടെ ഏഴു നടന്മാരുടെ മുംബൈയിലെ വസതികള് മുംബൈ മുന്സിപ്പല് കോര്പ്പറേഷന് പൊളിച്ചു നീക്കിയേക്കും. 2017ല് റോഡ് വീതികൂട്ടുന്നത് ചൂണ്ടിക്കാട്ടി മുംബൈ മുനിസിപ്പല് കോര്പ്പറേഷന് നോട്ടീസ് നല്കിയിരുന്നവരുടെ കെട്ടിടങ്ങളുടെ ഭാഗങ്ങള് അനധികൃത നിര്മ്മാണത്തിന്റെ പേരിലാണ് പൊളിച്ചു നീക്കുന്നത്.
അമിതാഭ് ബച്ചന്റെ ബംഗ്ലാവ് പ്രതീക്ഷയുടെ ഒരു ഭാഗം മുംബൈ മുന്സിപ്പല് കോര്പറേഷന് പൊളിച്ചുനീക്കും. 2017ല് നല്കിയ നോട്ടീസിന്റെ തുടര്നടപടിയായി മുംബൈ മുന്സിപ്പല് കോര്പ്പറേഷന് ആരംഭിച്ചതായും പ്രതീക്ഷയുടെ ഒരു ഭാഗം ഉടന് പൊളിച്ചുനീക്കുമെന്നും വാര്ത്താ ഏജന്സിയായ എഎന്ഐ റിപ്പോര്ട്ട് ചെയ്തു. അമിതാഭ് ബച്ചനും രാജ്കുമാര് ഹിരാനിയും ഉള്പ്പെടെ ഏഴ് പേര്ക്കാണ് നോട്ടീസ് നല്കിയിരിക്കുന്നത്.
റോഡ് വീതികൂട്ടുന്നതിനായി പൊളിച്ചുനീക്കേണ്ട കെട്ടിടത്തിന്റെ കൃത്യമായ ഭാഗം നിര്ണ്ണയിക്കാന് കോര്പ്പറേഷന് നിര്ദ്ദേശം നല്കിയതായാണ് റിപ്പോര്ട്ട്. ബച്ചനെതിരേ നടപടിയെടുക്കുന്നില്ലെന്നാരോപിച്ച് കോണ്ഗ്രസ് കൗണ്സിലര് തുലിപ് ബ്രയാന് മിറാന്ഡ പ്രശ്നം ഉന്നയിച്ച സാഹചര്യത്തിലാണ് നടപടിയുമായി മുംബൈ മുനിസിപ്പല് കോര്പ്പറേഷന് നടപടിയെടുത്തിരിക്കുന്നത്. റോഡ് വീതികൂട്ടല് നയപ്രകാരം 2017 ല് അമിതാഭ് ബച്ചന് ബിഎംസി നോട്ടീസ് നല്കിയെങ്കിലും നടപടിയൊന്നും സ്വീകരിച്ചിട്ടില്ല.
ഒരു സാധാരണക്കാരന്റെ ഭൂമിയായിരുന്നുവെങ്കില്, ബിഎംസി അത് ഉടനടി ഏറ്റെടുക്കുമായിരുന്നു. നോട്ടീസ് നല്കിയ ശേഷം റോഡ് വീതികൂട്ടല് പദ്ധതിക്ക് അപ്പീല് ആവശ്യമില്ലെന്നാണ് കൗണ്സിലര് വാര്ത്താ ഏജന്സിയായ എഎന്ഐയോട് പറഞ്ഞത്.
