കൊട്ടാരത്തിലെ താമസം വളരെ സുഖകരമാണെന്നാണ് പലരും കരുതുന്നത്. എന്നാല് അത് അത്ര സുഖകരമല്ലെന്നാണ് ലുഡോവിക സന്നസാരോ എന്ന പത്തൊമ്പതുകാരി പറയുന്നത്. വടക്കന് ഇറ്റലിയിലെ പീദ്മോണ്ട് മേഖലയിലെ മോണ്ഫെറാറ്റോയ്ക്ക് സമീപത്തുള്ള കാസ്റ്റെല്ലോ സന്നസാരോ എന്ന പന്ത്രണ്ടാം നൂറ്റാണ്ടിലെ ഒരു കൊട്ടാരത്തിലാണ് ലുഡോവിക സന്നസാരോ താമസിയ്ക്കുന്നത്. എന്നാല് ഇവിടെ നെറ്റ് കിട്ടാത്തതും തണുപ്പും എല്ലാം പ്രശ്നങ്ങളാണെന്നാണ് അവള് പറയുന്നത്.
28 തലമുറകളായി സന്നസാരോ കുടുംബം ഈ കൊട്ടാരത്തിലാണ് താമസിക്കുന്നത്. 1986 -ലാണ് അവകാശം ലുഡോവിക്കയുടെ അച്ഛനിലേക്ക് വന്നത്. 2006 -ല് കുടുംബം ഇങ്ങോട്ട് താമസം മാറ്റി. 900 വര്ഷത്തെ പഴക്കമാണ് കൊട്ടാരത്തിനുള്ളത്. 45 മുറികളും 15 ബെഡ്റൂമുകളും ഉണ്ട്. 107,639 സ്ക്വയര് ഫീറ്റുണ്ട് ഇത്. 18-19 -ാം നൂറ്റാണ്ടിലെ സ്റ്റൈലിലാണ് ഇതിനകത്തെ ഫര്ണിച്ചറുകളുള്ളത്.
ലോക്ക്ഡൗണ് സമയത്ത് ടിക്ടോക്കില് 'കാസ്റ്റില് ഡയറി' എന്ന പേരില് കൊട്ടാരത്തിലെ ജീവിതം ലുഡോവിക്ക ചെയ്തിരുന്നു. താന് വളര്ന്നതിവിടെയാണെന്ന് അവള് പറയുന്നു. അതുകൊണ്ട് തന്നെ തനിക്ക് അതിനെന്തെങ്കിലും പ്രത്യേകഭംഗിയുള്ളതായി മറന്നുപോകാറുണ്ടെന്നും ലുഡോവിക്ക പറയുന്നു. പോസ്റ്റുമാനില് നിന്നും പാക്കേജ് വാങ്ങാന് ഓടിയോടി എത്തുമ്പോഴേക്കും പോസ്റ്റുമാന് പോകുമെന്ന് അവള് പറയുന്നു. നെറ്റ് കിട്ടാത്ത ബുദ്ധിമുട്ട്, തണുപ്പ്, കൊട്ടാരത്തിന്റെ വലിപ്പം, വൃത്തിയാക്കാനുള്ള പ്രയാസം എന്നിവയൊക്കെ പ്രശ്നങ്ങളാണെന്ന് അവള് പറയുന്നു. ഏതെങ്കിലും ഒരു ബന്ധുവിനെ കണ്ടെത്തണമെങ്കില് ഇത്രയധികം മുറികളില് നോക്കണം, ഒരുദിവസം തന്നെ ചിലപ്പോള് തെരഞ്ഞ് തീര്ന്നു പോകുമെന്നും ലുഡോവിക്ക പറയുന്നു.
