തിരുവനന്തപുരം: ടെസ്റ്റ് പോസിറ്റീവിറ്റി നിരക്ക് 10 ശതമാനം വരെയുള്ള പ്രദേശങ്ങളില് ലോക്ഡൗണില് ഇളവ് നല്കാന് തീരുമാനം. എസി പ്രവര്ത്തിപ്പിക്കാതെ 20 പേരെ അനുവദിച്ച് ഇന്ഡോര് സ്റ്റേഡിയങ്ങളും ജിംനേഷ്യവും തുറക്കാം. ഹോട്ടലുകള് 9.30 വരെ പ്രവര്ത്തിക്കാമെന്നുമാണ് വിവരം. കോവിഡ് വ്യാപനത്തിന്റെ തോത് കുറഞ്ഞാല് മാത്രമെ മറ്റ് ഇളവുകളെ കുറിച്ച് ആലോചിക്കൂ.
മുഖ്യമന്ത്രിയുടെ നേതൃത്വത്തില് ചേര്ന്ന അവലോകന യോഗത്തിലാണ് ഇളവുകള് നല്കാന് തീരുമാനം എടുത്തത്. ടിപിആര് അഞ്ചില് താഴെയുള്ള പ്രദേശങ്ങള് എ വിഭാഗത്തിലും അഞ്ചു മുതല് 10 വരെയുള്ള പ്രദേശങ്ങള് ബിയിലും 10 മുതല് 15 വരെയുള്ളവ സി വിഭാഗത്തിലും ഉള്പ്പെടുത്തി. 15ന് മുകളില് ടിപിആര് ഉള്ള പ്രദേശങ്ങള് ഡിയില് ആയിരിക്കും. നാളെ മുതല് ഇതിനെ അടിസ്ഥാനപ്പെടുത്തി ആയിരിക്കും നിയന്ത്രണം.
എ, ബി വിഭാഗത്തില് ഉള്പ്പെടുന്ന പ്രദേശങ്ങളിലെ സര്ക്കാര് ഓഫിസുകള് മുഴുവന് ജീവനക്കാരെയും സിയിലെ സര്ക്കാര് ഓഫിസുകള് 50 ശതമാനം ജീവനക്കാരെയും ഉള്ക്കൊള്ളിച്ച് പ്രവര്ത്തിക്കും. ആര്ടിപി 10 ന് താഴെയുള്ള സര്ക്കാര് ഓഫീസുകള് മുഴുവന് ജീവനക്കാരേയും വെച്ച് പ്രവത്തിക്കാമെന്നും വിനോദ സഞ്ചാരമേഖലയിലെ താമസ സൗകര്യങ്ങള് തുറന്നു പ്രവര്ത്തിക്കാമെന്നും പുതിയ നിര്ദേശത്തില് പറയുന്നു. ആര്ടിപിസിആര് എടുത്ത് നെഗറ്റീവായവര്ക്കും രണ്ടു വാക്സിന് സ്വീകരിച്ചവര്ക്കും വിനോദസഞ്ചാര മേഖലയില് പ്രവേശനം അനുവദിക്കാം. കോവിഡ് വ്യപനം കൂടുതലുള്ള എല്ലാ പ്രദേശങ്ങളിലും കോവിഡ് പരിശോധനകളുടെ എണ്ണം കൂട്ടും.
എ, ബി എന്നീ വിഭാഗങ്ങളില് ഉള്പ്പെടുന്ന പ്രദേശങ്ങളില് റെസ്റ്ററന്റുകള്, ഹോട്ടലുകള് എന്നിവയ്ക്കു ഹോം ഡെലിവറി, ടേക്ക് എവേ സംവിധാനത്തില് രാത്രി 9.30 വരെ പ്രവര്ത്തിക്കാം. വിനോദസഞ്ചാര മേഖലകളിലെ താമസ സൗകര്യങ്ങള് കേന്ദ്ര ആരോഗ്യ മന്ത്രാലയത്തിന്റെ സ്റ്റാന്ഡേര്ഡ് ഓപ്പറേറ്റിങ് നടപടിക്രമവും ടൂറിസം മന്ത്രാലത്തിന്റെ മാര്ഗനിര്ദേശങ്ങളും അനുസരിച്ചാകും പ്രവര്ത്തിക്കേണ്ടത്. ആള്ക്കൂട്ടം ഒരു കാരണവശാലും അനുവദിക്കില്ല. എല്ലാവിഭാഗം പ്രദേശങ്ങളിലും ടെസ്റ്റിന്റെ എണ്ണം വര്ധിപ്പിക്കാന് നിര്ദേശം നല്കി.
താല്ക്കാലിക ജീവനക്കാരെ ഈ ഘട്ടത്തില് പിരിച്ചുവിടാന് പാടില്ല എന്ന നിര്ദേശം എല്ലാവരും കര്ശനമായി പാലിക്കണം. എ വിഭാഗത്തില് 82, ബിയില് 415, സിയില് 362, ഡിയില് 175 എന്നിങ്ങനെ തദ്ദേശ സ്വയംഭരണ സ്ഥാപങ്ങളാണ് ഒടുവില് കണക്കാക്കിയ ടിപിആര് പ്രകാരം ഉള്പ്പെടുക. കാസര്കോട്ടെ ആദിവാസി മേഖലയിലെ രോഗവ്യാപനം നിയന്ത്രിക്കാന് പ്രത്യേക ഇടപെടലിന് നിര്ദേശിക്കുകയും ചെയ്തിട്ടുണ്ട്.
