സനൽ അമാൻ എന്ന 35 കാരന് നാടകനടനെ എത്ര പേര്ക്കറിയാം? അത്രയധികം ആള്ക്കാര് ഉണ്ടായെന്ന് വരികില്ല. എന്നാല് സാമൂഹ്യ മാധ്യമങ്ങളില് വന് ചര്ച്ചയായി മാറിയിരിക്കുന്ന ഫഹദ് ഫാസിലിന്റെ പുതിയ ചിത്രം ‘മാലികി’ ലെ ഫ്രെഡി എന്ന 17 കാരനെ സിനിമ കണ്ടവര് അത്ര പെട്ടെന്നൊന്നും മറക്കില്ല. നായകന് അലിക്കയെ കൊലപ്പെടുത്താന് പോലീസ് നിയോഗിക്കുന്ന കൗമാരക്കാരനായി എത്തിയത് 35 കാരന് സനല് അമാന് ആയിരുന്നു. പലരുടെയും കയ്യിലെ ചട്ടുകമായി സ്വന്തം ജീവിതം കൈവിട്ടു പോകുന്ന ഫ്രെഡ്ഡി സനലിന് നല്കിയിരിക്കുന്ന പ്രശസ്തി ചില്ലറയല്ല.
ഒറ്റ സിനിമ കൊണ്ടു തന്നെ സ്വന്തം പ്രായത്തിന്റെ നേര് പകുതി പ്രായമുള്ള ഗൗരവതരമായ കഥാപാത്രത്തെ സനല് മികച്ചതാക്കി. സിനിമ കണ്ടിറങ്ങുന്ന ആരും അലിക്കയെ കൊല്ലാൻ നിയോഗിക്കപ്പെട്ട ആ കൗമാരക്കാരൻ പയ്യൻ ആരെന്ന് തിരക്കിപ്പോകും. നാലു വര്ഷം മുമ്പ് സംവിധായകന് മഹേഷ് നാരായണന് കാണാനിടയായ സനല് തന്നെ സംവിധാനം ചെയ്ത് അഭിനയിച്ച ‘ദ് ലവർ’ എന്ന ഒരു നാടകമായിരുന്നു മാലിക്കിലേക്ക് അവസരം നല്കിയത്. പിന്നീട് 2019 -ൽ കൊച്ചിയിലേക്ക് വിളിച്ച് മാലിക്കിലെ വേഷത്തെക്കുറിച്ച് പറഞ്ഞു.
34 വയസ്സുള്ളപ്പോള് നേര് പകുതി പ്രായത്തിലുള്ള കഥാപാത്രമാകാനായിരുന്നു സംവിധായകന്റെ നിര്ദേശം. താരത്തിന്റെ കഴിവില് പൂര്ണ്ണ വിശ്വാസം ഉണ്ടായിരുന്ന സംവിധായകന് ആകെ ആവശ്യപ്പെട്ടത് തടി കുറയ്ക്കാന് മാത്രം. പിന്നീട് തിരുവനന്തപുരത്ത് ഒരു യോഗ സെന്ററിൽ യോഗയ്ക്ക് ചേർന്ന സമയത്ത് മാലിക്കിലേക്കുള്ള കരാറില് സനലിനെക്കൊണ്ട് കരാര് ഒപ്പിടുവിക്കുകയും ചെയ്തു. സിനിമ എന്ന ലക്ഷ്യം മനസ്സിൽ വന്നപ്പോൾ ഞാൻ ആത്മാർത്ഥമായി തന്നെ ഡയറ്റും യോഗയും ചെയ്തു തുടങ്ങി. ഒരു മാസത്തെ ട്രെയിനിങ് കഴിഞ്ഞപ്പോൾ ചെറുപ്പത്തിലേക്ക് തിരിച്ചുപോവുകയും ചെയ്തു.
