തൃശൂർ : വന്തുകയുടെ അഴിമതി നടന്ന ഇരിങ്ങാലക്കുട കരുവന്നൂര് സഹകരണ ബാങ്കില് 3 പ്രതികളിലൂടെ മാത്രം വായ്പയായി പോയത് 76 കോടി രൂപ! ഇവയിൽ ഒട്ടുമിക്ക വായ്പകളിലും ഒരു രൂപ പോലും തിരിച്ചടവുണ്ടായിട്ടില്ല. സഹകരണ വകുപ്പു നടത്തുന്ന അന്വേഷണത്തിനു സമാന്തരമായി പാര്ട്ടി നടത്തിയ അന്വേഷണത്തിലാണ് ഈ കണ്ടെത്തല്. ദിവസക്കൂലിക്കാരായ അനേകരുടെ പേരിലാണ് അരക്കോടി വരെ വായ്പ നല്കിയത്.
വായ്പ അനുവദിച്ചതില് മാനേജരുടെ ഭാര്യയും ബന്ധുക്കളും പാര്ട്ടിപ്രവര്ത്തകരും വരെയുണ്ടെന്നാണ് വിവരം. സിപിഎം നയിക്കുന്ന ബാങ്കിൽ 125 കോടിയിലേറെ രൂപയുടെ അഴിമതി നടന്നതായിട്ടാണ് കണ്ടെത്തിയിരിക്കുന്നത്. പെയിന്റിങ് തൊഴിലാളിയ്ക്ക് അനുവദിച്ചത് 50 ലക്ഷം രൂപയുടെ വായ്പയായിരുന്നു. ദിവസക്കൂലിക്കാരായ മറ്റനേകം പേരുടെ പേരില് വായ്പ നല്കിതായി സിപിഎം അന്വേഷണ സമിതി കണ്ടെത്തിയിട്ടുണ്ട്.
വായ്പാ തട്ടിപ്പു കേസിൽ പൊലീസ് പ്രതിചേർത്ത മുൻ മാനേജർ ക്രമവിരുദ്ധമായി അനുവദിച്ച 26 കോടിയുടെ വായ്പയില് ഇടപാട് അനുവദിച്ചവരില് മാനേജരുടെ സ്വന്തം ഭാര്യയും ഭാര്യാപിതാവും സ്വന്തം മാതാപിതാക്കളും വരെയുണ്ടെന്നാണ് അന്വേഷണത്തിനായി പാര്ട്ടി തന്നെ നിയോഗിച്ച അന്വേഷണ സംഘം കണ്ടെത്തിയിരിക്കുന്നത്. 52 പേർക്കു 50 ലക്ഷം വീതം വായ്പ നൽകിയ കൂട്ടത്തിലാണ് സ്വന്തക്കാരും ബന്ധക്കാരുമുള്ളത്.
സഹകരണ ബാങ്ക് വായ്പാ ചട്ടങ്ങൾ പ്രകാരം ഒരാൾക്കു പരമാവധി അനുവദിക്കാവുന്ന വായ്പാത്തുക 50 ലക്ഷം രൂപയാണ്. ഈ വായ്പാ പരിധി മറികടന്നാൽ അന്വേഷണം ഉണ്ടായേക്കുമെന്നതിനാൽ കൃത്യം 50 ലക്ഷം രൂപ വീതം ഒട്ടേറെപ്പേർക്കു വായ്പ നൽകിയാണു പ്രതികൾ തട്ടിപ്പു നടത്തിയത്. മുൻ മാനേജർ 52 പേർക്കായി 26 കോടി രൂപ വായ്പയായി നൽകിയപ്പോൾ, പ്രതിപ്പട്ടികയിലുള്ള ഇടനിലക്കാരൻ വഴി 48 പേർക്ക് 24 കോടി രൂപയും വായ്പ അനുവദിച്ചു. കമ്മിഷൻ ഏജന്റ് വഴിക്കും 26 കോടി രൂപ വായ്പയായി അനുവദിച്ചു.
പ്രതിചേർക്കപ്പെട്ടവര് അല്ലാതെയും വായ്പാ തട്ടിപ്പ് നടന്നിട്ടുള്ളതായിട്ടാണ് കണ്ടെത്തല്. ഇതിൽ 4 പേർ വഴി 43 കോടി രൂപ ക്രമവിരുദ്ധമായി വായ്പ അനുവദിച്ചെന്നു സംശയമുണ്ട്. 10 ലക്ഷം രൂപയുടെ മാസത്തവണ നിക്ഷേപ പദ്ധതിയില് ഒരാളുടെ പേരിൽ മാത്രം നറുക്കെടുപ്പു നടത്തുക, 2 തവണ പണം അനുവദിക്കുക തുടങ്ങിയ ഏർപ്പാടുകളും നടന്നിരുന്നതായി കണ്ടെത്തി.
50 ലക്ഷം വായ്പ അനുവദിച്ച കേസില് പലിശ സഹിതം വായ്പ 78 ലക്ഷം രൂപയുടെ കുടിശികയായി ഉയർന്നിട്ടുണ്ട്. തൊഴിലാളിയുടെ പേരിൽ വായ്പ എടുത്തതു വ്യാജരേഖ ചമച്ചാണോ എന്നും സംശയമുണ്ട്. അഴിമതിയിൽ പാർട്ടി നേതാക്കൾക്കു പങ്കുണ്ടെന്നു സിപിഎം അന്വേഷണം സംഘവും കണ്ടെത്തിയതായി സൂചന. സംസ്ഥാനത്ത് നടന്ന ഏറ്റവും വലിയ അഴിമതിയാണിത്.
ഭൂമി നഷ്ടപ്പെടുമെന്ന അവസ്ഥയിൽ ഒരു പാർട്ടി അംഗം നൽകിയ പരാതിയെത്തുടർന്നാണു ജില്ലാ കമ്മിറ്റി അന്വേഷിച്ചത്.125 കോടിയെന്നതു പ്രാഥമിക നിഗമനമാണ്. ജില്ലാ സെക്രട്ടേറിയറ്റ് അംഗമായ പി.കെ. ഷാജനും മുൻ എംപി പി.കെ.ബിജുവാണ് അന്വേഷണം നടത്തിയത്. അന്വേഷണത്തിലെ കണ്ടെത്തലുകൾ ജില്ലാ കമ്മിറ്റിയെ അറിയിച്ചതോടെയാണു സഹകരണ വകുപ്പിനോടു ശക്തമായ നടപടിയെടുക്കാൻ പാർട്ടി നിർദേശിച്ചത്.
