കോഴിക്കോട്: ആദ്യ സന്തോഷം എല്ലാ വിഷയങ്ങള്ക്കും എ പ്ലസ് നേടി പത്താംക്ലാസ്സ് ജയിച്ചത്. രണ്ടാമത്തെ സന്തോഷമാകട്ടെ ഏറ്റവും പ്രിയപ്പെട്ട സിനിമാതാരം വിളിച്ചതും. ബംഗാളി പെണ്കുട്ടിയായ റോക്ഷത് ഖാത്തൂന് ഇരട്ടിസന്തോഷമാണ്. കഴിഞ്ഞ ദിവസം നടന് ദിലീപ് അഭിനന്ദനം അറിയിക്കാന് വിളിച്ചപ്പോള് ഇരട്ടി സന്തോഷം.
റോക്ഷത് കേരളത്തില് ഇത്രയും കാലം ജീവിച്ചിട്ട് കണ്ടിട്ടുള്ളത് മുഴുവന് ദിലീപ് ചിത്രങ്ങളാണ്. കഴിഞ്ഞ ദിവസം വീഡിയോ കോള് ചെയ്ത് സ്വന്തം ആരാധികയെ വിളിച്ച ദിലീപ് കോഴിക്കോട് എത്തുമ്പോള് കാണാമെന്നും ഉറപ്പ് നല്കിയിട്ടുണ്ട്.
കോഴിക്കോട്ടെ ഇന്ഡസ്ട്രീയല് ഏരിയയില് ജോലി ചെയ്യുന്ന പിതാവ് റഫീഖിനൊപ്പം നാലു വയസ്സുള്ളപ്പോള് കേരളത്തിലെത്തിയ റോക്ഷത് ഇപ്പോള് വെള്ളിമാടുകുന്ന് ജിഎച്ച്എസ്എസിലെ വിദ്യാർഥിനിയാണ്. സ്കൂളിന്റെ ചരിത്രത്തിലെ ആദ്യ സമ്പൂർണ എ പ്ലസ് വിജയമാണ് റോക്ഷത്തിന്റേത്.
മലയാളത്തെ ഏറെ സ്നേഹിക്കുന്ന റോക്ഷത് ഖാത്തൂൻ പക്ഷേ മലയാള സിനിമകൾ കാണുന്നത് ദിലീപിന്റെ മാത്രമാണ്. ഇതുവരെ കണ്ടിട്ടുള്ളതും. ഇക്കാര്യം തിരിച്ചറിഞ്ഞ് കഴിഞ്ഞ ദിവസം ദിലീപ് റോക്ഷത്തിനെ നേരിട്ട് വിളിക്കുകയും ചെയ്തു.
കോഴിക്കോട്ട് ഇനി എന്തെങ്കിലും ആവശ്യത്തിന് വരുമ്പോള് വരാമെന്നും താരം ഉറപ്പു കൊടുത്തിരിക്കുകയാണ്. സഹോദരിക്കും കുടുംബത്തോടും ഒപ്പമാണ് ദിലീപിന്റെ വിഡിയോ കോൾ റോക്ഷത് അറ്റൻഡ് ചെയ്തത്. കുടുംബത്തിലെ എല്ലാവരോടും ദിലീപ് സംസാരിച്ചു.
റോക്ഷത്തിന്റെ അച്ഛൻ റഫീഖും ദിലീപിന്റെ കടുത്ത ആരാധകനാണ്. മാതൃഭാഷ അല്ലാതിരുന്നിട്ടും മലയാളം ഉള്പ്പെടെയുള്ള വിഷയങ്ങളില് പോലും എ പ്ലസ് നേടിയ റോക്ഷത് വലിയ ആഗ്രഹങ്ങളില് ഒന്നായി പറഞ്ഞത് ദിലീപിനെ നേരിട്ടു കാണണം എന്നതായിരുന്നു.
വീട്ടില് എല്ലാവരും ബംഗാളിയാണ് പറയുന്നതെങ്കിലും നാട്ടിലിറങ്ങിയാല് റോക്ഷതും ചേച്ചിയും പിതാവും നല്ല മണിമണി പോലെ ആള്ക്കാരുമായി മലയാളം സംസാരിക്കും. പക്ഷേ അമ്മ നൂര്ജഹാന് ഇപ്പോഴും മലയാളം ശരിക്കങ്ങ് പിടി കിട്ടിയിട്ടില്ല.
