ഇന്ത്യന് വാഹന നിര്മാതാക്കളായ ബജാജ് തങ്ങളുടെ പുത്തൻ ബൈക്കായ് പൾസർ 250Fന്റെ നിർമാണത്തിലാണെന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്. പൾസർ 220 Fന് സമാനമായി സെമി ഫെയേഡ് ബൈക്ക് ആണ് പൾസർ 250F എന്നാണ് ടെസ്റ്റ് ബൈക്കിന്റെ ചിത്രങ്ങൾ നൽകുന്ന വിവരങ്ങൾ.
എൽഇഡി ഹെഡ്ലാമ്പുള്ള ആദ്യ പൾസർ ബൈക്കുമായിരിക്കും 250F എന്നും റിപ്പോർട്ടുണ്ട്. പൾസർ 250Fന് വോൾഫ് ഐ സ്റ്റൈൽ ഹെഡ്ലാംപാണ് എന്ന് ചിത്രങ്ങൾ പറയുന്നു. മാത്രമല്ല ഹെഡ്ലാംപ് ക്ലസ്റ്ററിൽ കൺ പുരികങ്ങൾ പോലെ തോന്നിപ്പിക്കുന്ന ഡേടൈം റണ്ണിങ് ലാമ്പുകളും ഉൾക്കൊള്ളിച്ചിട്ടുണ്ട്. പൾസർ 250Fയുടെ ടെസ്റ്റ് ബൈക്കിന് പൾസർ 220 F-നേക്കാൾ വലിപ്പമേറിയ വൈസർ ആണ്. കൂടുതൽ അംഗുലർ ആയ ഫെയറിങ്, ക്ലിപ്പ് ഓൺ ഹാൻഡിൽ ബാറുകൾ, വ്യത്യസ്തമായ X ഷെയ്പ്പിലുള്ള ടെയിൽ ലാംപ്, സ്പ്ലിറ്റ് ഗ്രാബ് റെയിൽ എന്നിവയും പൾസർ 250Fനുണ്ടാവും എന്നാണ് ചിത്രങ്ങൾ വ്യക്തമാക്കുന്നത്.
പൾസർ NS200ന് സമാനമായ 17 ഇഞ്ച് അലോയ് വീലാണ് ബൈക്കിൽ ഉള്ളത്. ഇത് പൾസർ NS200ന് സമാനമായ ബ്രെയ്ക്കും പൾസർ 250Fൽ ഇടം പിടിക്കും എന്ന സൂചന നൽകുന്നു. ബജാജ് ഡോമിനാർ 400ന് സമാനമായ എന്നാൽ വലിപ്പം കുറഞ്ഞ ഡബിൾ ബാരൽ എക്സ്ഹോസ്റ്റ് ആണ് പൾസർ 250F-യിൽ ഇടം പിടിക്കുക. ബജാജ് പൾസർ 250F-ന് ടെലിസ്കോപിക് മുൻ ഫോർക്കുകളും പുറകിൽ മോണോ സസ്പെൻഷനുമായിരിക്കും. ബജാജ് പൾസർ 250F എന്ന് വില്പനക്കെത്തും എന്ന് ഇപ്പോൾ വ്യക്തമല്ല.
