ദൃശ്യത്തിന്റെ രണ്ടാം ഭാഗത്തിനും കിട്ടിയ വലിയ വരവേല്പ്പില് മോഹന്ലാലുമായി ജീത്തു ജോസഫ് വീണ്ടും ഒന്നിക്കുന്നു. ഇത്തവണ ട്വൽത് മാന് എന്ന പുതിയ ത്രില്ലർ ചിത്രത്തിനായിട്ടാണ് ഇരുവരും ഒന്നിക്കുന്നത. സിനിമയുടെ ചിത്രീകരണം ഇടുക്കിയിൽ ഇന്ന് ആരംഭിച്ചു. ഒരു മിസ്റ്റ്റി ത്രില്ലറാണ് ഒരുക്കുന്നതെന്ന് സംവിധായകൻ ജീത്തു ജോസഫ് നേരത്തേ നല്കിയ ഒരു അഭിമുഖത്തില് വ്യക്തമാക്കിയത്.
ആകെ 14 അഭിനേതാക്കള് മാത്രമുള്ള സിനിമയുടെ ചിത്രീകരണം 25 ദിവസത്തിൽ പൂർത്തിയാക്കാനാണ് ശ്രമിക്കുന്നത്. ചിത്രത്തിൽ അദിതി രവി, പ്രിയങ്ക നായര്, വീണാ നന്ദകുമാര്, അനുശ്രീ, ശിവദ, സൈജു കുറുപ്പ്, ലിയോണ ലിഷോയ്, അനു മോഹന് എന്നിവർ ചിത്രത്തിൽ കേന്ദ്ര കഥാപാത്രങ്ങളായി എത്തുന്നുണ്ട്. പതിവിന് വിപരീതമായി നവാഗതനായ തിരക്കഥാകൃത്തിനെയാണ് ജിത്തു ഇത്തവണ ഉപയോഗിച്ചിരിക്കുന്നത്. കെ കൃഷ്ണൻകുമാരൻ എന്നയാളാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്.
ട്വൽത് മാൻ അൺവീലിങ് ദി ഷാഡോസ് എന്നാണ് ചിത്രത്തിന്റെ പൂർണമായ പേര്. ഒരു ദിവസം നടക്കുന്ന സംഭവങ്ങളാണ് സിനിമ പറയുന്നത്. പൃഥ്വിരാജ് സംവിധാനം ചെയ്യുന്ന ബ്രോ ഡാഡിയുടെ സെറ്റില് നിന്നുമാണ് മോഹൻലാൽ ട്വൽത് മാനിലേക്ക് എത്തുന്നത്. ചിത്രത്തിന്റെ ഫസ്റ്റ് ലുക്ക് മോഹൻലാൽ തന്റെ സോഷ്യൽ മീഡിയ പേജുകളിലൂടെ ജൂലൈ 5 ന് പുറത്ത് വിട്ടിരുന്നു.
മഞ്ഞ് മൂടിയ താഴ്വാരത്ത് ഉള്ള ഒരു നിഘൂഢമായ വീട്ടിലേക്ക് ഒരാൾ നടന്ന് കയറുന്ന ദൃശ്യമാണ് ചിത്രത്തിന്റെ പോസ്റ്ററിൽ ഒരുക്കിയിട്ടുള്ളത്. വീടിന്റെ ഉള്ളിൽ 11 നിഴലുകൾ വ്യക്തമാണ്. അതിലേക്ക് പന്ത്രണ്ടാമനായി ചെല്ലുന്ന ആളുടെ ദൃശ്യമാണ് പോസ്റ്റിൽ ഉൾപ്പെടുത്തിയിരിക്കുന്നു. സിനിമയുടെ റിലീസിംഗ് ഒടിടി യിലാണോ തീയേറ്ററിലാണോ എന്ന കാര്യം ഇതുവരെ അണിയറ പ്രവത്തകർ വ്യക്തമാക്കിട്ടില്ല.
