തിരുവനന്തപുരം: കൊല്ലം കുണ്ടറയില് എന്.സി.പി നേതാവ് യുവതിയോട് അപമര്യാദയായി പെരുമാറിയ സംഭവത്തില് കേസ് പിന്വലിക്കാന് മന്ത്രി എ.കെ ശശീന്ദ്രന് ഇടപെട്ടുവെന്ന പരാതി തീര്പ്പാക്കാന് പോലീസിന് നിയമോപദേശം. ' നല്ല രീതിയില് തീര്പ്പാക്കണം' എന്ന മന്ത്രിയുടെ പരാമര്ശത്തില് തെറ്റില്ലെന്നാണ് പോലീസിന് ലഭിച്ച നിയമോപദേശം.
നിവൃത്തി വരുത്തുക, കുറവ് തീര്ക്കുക എന്ന അര്ത്ഥത്തിലാണ് മന്ത്രി സംസാരിച്ചത്. കേസിനെ കുറിച്ചോ പെണ്കുട്ടിയുടെ പേരോ മറ്റ് വിശദാംശങ്ങളോ മന്ത്രി ഫോണ് സംഭാഷണത്തില് പറയുന്നില്ല. കേസ് പിന്വലിക്കണമെന്ന ഭീഷണിയോ ഫോണ് സംഭാഷണത്തില് ഇല്ലെന്നും അതിനാല് മന്ത്രിക്കെതിരെ കേസെടുക്കേണ്ടന്നാണ് നിഘണ്ടു ഉദ്ധരിച്ചുള്ള നിയമോപദേശം. ജില്ലാ ഗവണ്മെന്റ് പ്ലീഡര് ആര്.സേതുനാഥന്പിള്ളയാണ് ശാസ്താംകോട്ട ഡി.വൈ.എസ്.പിക്ക് ഈ നിയമോപദേശം കൈമാറിയത്.
അതേസമയം, മന്ത്രിയെ കുറ്റമുക്തനാക്കുന്നതില് എതിര്പ്പുമായി പ്രതിപക്ഷം രംഗത്തെത്തി. മന്ത്രിയെ കുറ്റവിമുക്തനാക്കിയാല് നിയമപരമായി നേരിടുമെന്ന് പ്രതിപക്ഷ നേതാവ് വി.ഡി സതീശന് പറഞ്ഞു. പരാതി പോലീസ് സ്റ്റേഷനില് നിലനില്ക്കുന്ന സമയത്ത് പെണ്കുട്ടിയുടെ പിതാവിനെ ഒത്തുതീര്പ്പിന് വിളിച്ചത് ധാര്മ്മികമായ വിഷയം മാത്രമല്ല നിയമപരമായ പ്രശ്നം കൂടിയാണ്. പോലീസ് സ്റ്റേഷനില് നിലനില്ക്കുന്ന ഒരു പരാതിയില് ആരും ഒത്തുതീര്പ്പിന് ഇടപെടാന് പാടില്ലെന്നും സതീശന് പറഞ്ഞു.
വ്യാഖ്യാനിച്ചത് പിണറായി വിജയന്റെ നിഘണ്ടുവാണെന്ന് കോണ്ഗ്രസ് നേതാവ് രമേശ് ചെന്നിത്തല പ്രതികരിച്ചു. പിണറായിയുടെ നിഘണ്ടുവില് മാത്രമേ ഇത്തരം പരാമര്ശങ്ങള് തെറ്റല്ലാതാവൂവെന്നും അദ്ദേഹം വിമര്ശിച്ചു.
എന്.സി.പി നേതാവ് അപമാനിക്കാന് ശ്രമിച്ചതിനെതിരെ പെണ്കുട്ടി നല്കിയ പരാതി ഒത്തുതീര്പ്പാക്കാന് മന്ത്രി ശശീന്ദ്രന് പെണ്കുട്ടിയുടെ പിതാവിനെ ജൂലായ് നാലിന് വിളിച്ചുവെന്നാണ് ആക്ഷേപം. എന്നാല് പാര്ട്ടിയിലെ പ്രശ്നം പരിഹരിക്കാനാണ് താന് വിളിച്ചതെന്നും 'നല്ല രീതിയില് തീര്ക്കണമെന്ന്' മാത്രമാണ് പറഞ്ഞതെന്നുമാണ് മന്ത്രിയുടെ നിലപാട്. മറ്റ് പരാതികള് താന് അറിഞ്ഞിട്ടില്ലെന്നും മന്ത്രി പറയുന്നു. അതേസമയം, മന്ത്രി വിളിക്കുമ്പോള് ' എന്.സി.പി നേതാവ് തന്റെ മകളുടെ കയ്യില് കയറിപ്പിടിച്ച വിഷയം പരിഹരിക്കണമെന്നാണോ മന്ത്രി പറയുന്നതെന്ന്' പെണ്കുട്ടിയുടെ പിതാവ് തിരിച്ചുചോദിക്കുമ്പോള് 'അതെ, അതുതന്നെ' എന്ന് മന്ത്രി മറുപടി പറയുന്ന ശബ്ദരേഖയും പുറത്തുവന്നിരുന്നു.
