ലക്നൗ : രാഷ്ട്രപതിയുടെ ഉത്തര്പ്രദേശ് സന്ദര്ശനം മുതിര്ന്ന ബിജെപി നേതാവിന്റെ സന്ദര്ശനം പോലെയെന്ന വിമര്ശനവുമായി സമാജ് വാദി പാര്ട്ടി. അടുത്ത വര്ഷം നടക്കാനിരിക്കുന്ന നിയമസഭാ തിരഞ്ഞെടുപ്പിനായി രാഷ്ട്രപതി സ്ഥാനം പോലും ബി.ജെ.പി ഉപയോഗപ്പെടുത്തുകയാണ്- സമാജ്വാദ് പാര്ട്ടി നേതാവ് പവന് പാണ്ഡെ പറഞ്ഞു. ഇത് രണ്ടാം തവണയാണ് രാഷ്ട്രപതിയുടെ സന്ദര്ശനം.
ജൂണ് മാസത്തിലും അദ്ദേഹം യു.പിയില് സന്ദര്ശനം നടത്തിയിരുന്നു. മുതിര്ന്ന ബി.ജെ.പി നേതാവിന്റെ പര്യടനത്തിന് സമാനമായ രീതിയിലാണ് സന്ദര്ശനമെന്നും സമാജ്വാദി പാര്ട്ടി ആരോപിച്ചു. രാഷ്ട്രപതിക്ക് അദ്ദേഹം ആഗ്രഹിക്കുന്ന സ്ഥലങ്ങള് സന്ദര്ശിക്കാനുള്ള സ്വാതന്ത്ര്യമുണ്ടാവണം. പക്ഷെ രാഷ്ട്രപതിയുടെ സന്ദര്ശനത്തിലൂടെ രാഷ്ട്രീയ നേട്ടത്തിനാണ് ബി.ജെ.പി ശ്രമിക്കുന്നത്.
ഇത് രാജ്യത്തിന്റെ പ്രസിഡന്റിന്റെ സന്ദര്ശനം പോലെ തോന്നുന്നില്ല എന്ന് പറയാന് എനിക്ക് ഒരു മടിയുമില്ല, ഇത് ബി.ജെ.പിയുടെ ഒരു മുതിര്ന്ന നേതാവിന്റെ യാത്രയാണെന്ന് തോന്നുന്നു. രണ്ട് മാസങ്ങളുടെ ഇടവേളയിലാണ് രാഷ്ട്രപതി വീണ്ടും യു.പി പര്യടനത്തിനെത്തിയിരിക്കുന്നത്. രാമക്ഷേത്ര നിര്മാണം നടക്കുന്ന അയോധ്യയിലേക്കുള്ള ട്രെയിന് യാത്രയാണ് പര്യടനത്തിലെ ഏറ്റവും പ്രധാനപ്പെട്ട പരിപാടി.
രാഷ്ട്രപതി ഭവന് പുറത്തുവിട്ട വിവരങ്ങള് പ്രകാരം അയോധ്യയില് യൂ.പി സര്ക്കാരിന്റെ ടൂറിസം/സാംസ്കാരിക വകുപ്പുകളുടെ വിവിധ പരിപാടികളില് രാഷ്ട്രപതി പങ്കെടുക്കും. രാമക്ഷേത്ര നിര്മാണ ഭൂമി സന്ദര്ശിക്കുന്ന രാഷ്ട്രപതി അവിടെ പൂജയില് പങ്കെടുക്കുമെന്നും രാഷ്ട്രപതി ഭവന് വ്യക്തമാക്കി. ലഖ്നൗവിലെ അംബേദ്കര് യൂണിവേഴ്സിറ്റിയിലെ കോണ്വക്കേഷന് പരിപാടിയോടെയാണ് രാഷ്ട്രപതിയുടെ സന്ദര്ശനം ആരംഭിക്കുന്നത്.
