ആയിരക്കണക്കിന് അഫ്ഗാനിസ്ഥാന്കാര് രാജ്യം വിട്ടോടുമ്പോള് അഫ്ഗാനില് പുതിയതായി അധികാരം പിടിച്ചെടുത്ത താലിബാനെ ന്യായീകരിച്ച് പാകിസ്താന് ക്രിക്കറ്റ് ടീമിന്റെ മുന് നായകന് ഷഹീദ് അഫ്രീദി വിവാദത്തില്. താലിബാന്റെ സമീപനത്തെ പോസിറ്റീവായി സമീപിച്ച് ഓണ്ലൈനില് നടത്തിയ കുറിപ്പാണ് അഫ്രീദിയെ വെറുക്കപ്പെട്ടവനായി മാറ്റിയിരിക്കുന്നത്.
മുമ്പത്തെ താലിബാനെ അപേക്ഷിച്ച് നോക്കിയാല് ഇത്തവണത്തെ താലിബാന് മെച്ചമാണെന്നായിരുന്നു കുറിപ്പ്. ''സ്ത്രീകളെ ജോലി ചെയ്യാന് അനുവദിക്കുമെന്നും രാഷ്ട്രീയത്തില് ഇറങ്ങാന് അനുവദിക്കും. ക്രിക്കറ്റ് പ്രേമികളെ താലിബാന് പിന്തുണയ്ക്കും.'' അഫ്രീദി പറഞ്ഞു ലോകം മുഴുവന് താലിബാന് അഫ്ഗാന് പിടിച്ചതിനെ ആശങ്കയോടെ കാണുമ്പോഴാണ് വിരുദ്ധ അഭിപ്രായം അഫ്രീദി നടത്തിയത്.
പാകിസ്താനിലെ ഒരു ഓണ്ലൈന് മാധ്യമത്തിലായിരുന്നു അഫ്രീദിയുടെ പ്രതികരണം. അടുത്ത പാകിസ്താന് സൂപ്പര് ലീഗോടെ താന് ക്രിക്കറ്റ് അവസാനിപ്പിക്കുമെന്നും പറഞ്ഞു. അഫ്രീദിയുടെ പ്രതികരണം പെട്ടെന്ന് തന്നെ വൈറലായി മാറി. അഫ്ഗാനിസ്ഥാനിലെ ക്രിക്കറ്റുകളിക്കാരുടേയും കായിക താരങ്ങളുടെയും നിലപാടുകള്ക്ക് എതിരാണ് അഫ്രീദി. താലിബാന് അഫ്ഗാന് പിടിച്ചതിനെ അവര് പോലും എതിര്ക്കുകയാണ്. പല കായിക താരങ്ങളും ഇതിനകം രാജ്യം വിട്ടു കഴിഞ്ഞു. വനിതകള് ക്രിക്കറ്റ് കളിക്കുന്നതിരേ താലിബാന് പറയുന്നതിന്റെ പഴയ വീഡിയോകളും പലരും പോസ്റ്റ് ചെയ്തു കഴിഞ്ഞു.
