ഫ്രഞ്ച് കാര് നിര്മ്മാതാക്കളായ പിഎസ്എ ഗ്രൂപ്പിന്റെ കീഴിലുള്ള സിട്രോണ് ബെർലിംഗോ (Citroen Berlingo) എന്ന എംപിവിയുടെ പരീക്ഷണയോട്ടം ഇന്ത്യയിൽ നടക്കുന്നുണ്ടെന്ന് നേരത്തെ റിപ്പോര്ട്ടുകള് ഉണ്ടായിരുന്നു. ടൊയോട്ട ഇന്നോവയ്ക്ക് എതിരാളിയാകുന്ന ബെർലിംഗോ എന്ന ഈ എംപിവി (Citroen Berlingo) ഇപ്പോഴിതാ വീണ്ടും വാര്ത്തകളില് നിറയുകയാണ് .
ഇന്ത്യന് ഓട്ടോസ് ബ്ലോഗ് റിപ്പോര്ട്ട് അനുസരിച്ചു സിട്രോൺ ബെർലിംഗോയുടെ പരീക്ഷണം ഇന്ത്യന് നിരത്തുകളില് തുടരുകയാണ്. ഫ്രഞ്ച് കാർ നിർമ്മാതാക്കളുടെ ഈ എംപിവിക്ക് ഒരു പ്രത്യേക ഡിസൈൻ ഭാഷയുണ്ടെന്നാണ് സൂചന. ബമ്പറിൽ സിട്രോൺ സി 5 എയർക്രോസ് പോലുള്ള ട്രപസോയിഡൽ എയർ വെന്റുകളും തിരശ്ചീനമായി വിഭജിക്കപ്പെട്ട ഹെഡ്ലാമ്പുകൾ ഉണ്ടെന്നും റിപ്പോര്ട്ടുകള് ഉണ്ട്.
സിട്രോൺ ബെർലിംഗോ ആഗോളതലത്തിൽ രണ്ട് വേരിയന്റുകളില് വാഗ്ദാനം ചെയ്യുന്നു. ബെർലിംഗോയും ബെർലിംഗോ എക്സ്എല്ലും. ആദ്യത്തേതിന് 4.4 മീറ്റർ നീളമുണ്ടെങ്കിൽ, രണ്ടാമത്തേതിന് 4.75 മീറ്റർ നീളമുണ്ട്. റിപ്പോർട്ട് പ്രകാരം അന്താരാഷ്ട്ര വിപണികളിൽ, സിട്രോൺ ബെർലിംഗോ ശ്രേണിക്ക് രണ്ട് എഞ്ചിൻ ചോയ്സുകൾ വാഗ്ദാനം ചെയ്യുന്നു. ബെര്ലിങ്കോയുടെ ഇന്ത്യന് പരീക്ഷണയോട്ട ചിത്രങ്ങള് ആദ്യമായി പുറത്തുവന്നത് 2020 ഓഗസ്റ്റിലാണ്. ബെർലിംഗോ എംപിവിയുടെ ഇന്ത്യന് പ്രവേശനം സിട്രോൺ ഔദ്യോഗിമായി ഇതുവരെ സ്ഥിരീകരിച്ചിട്ടില്ല.
