പോളോയുടെ മാറ്റ് എഡിഷൻ ഉത്സവ സീസണില് നിരത്തുകളില് എത്താനൊരുങ്ങി ജര്മന് വാഹന നിര്മാതാക്കളായ ഫോക്സ്വാഗണ്. റിപ്പോർട്ട് പ്രകാരം അവതരണത്തിന് മുന്നോടിയായി ഈ വാഹനം ഡീലര്ഷിപ്പുകളില് എത്തി തുടങ്ങി. ഈ വാഹനം പോളോയുടെ ജി.ടി. വേരിയന്റിന്റെ അടിസ്ഥാനമാക്കിയായിരിക്കും ഒരുങ്ങുന്നത്.
മാറ്റ എഡിഷന് ജി.ടിയുടെ റെഗുലര് മോഡലിനെക്കാള് അല്പ്പം വില കൂടുതലായിരിക്കും എന്നാണ് സൂചന. പോളോ ജി.ടിക്ക് ഏകദേശം ഒമ്പത് ലക്ഷത്തോളം രൂപയാണ് എക്സ്ഷോറും വില. നിറത്തില് മാത്രമായിരിക്കും പുതുമയെന്നാണ് വിവരം. പോളോയുടെ പുതിയ പതിപ്പ് മാറ്റ് ഫിനീഷിങ്ങിലുള്ള ബ്രൗണ് നിറത്തിലാണ് ഒരുങ്ങുന്നത്. ഗ്രില്ലും അതിലെ ജി.ടി. ബാഡ്ജിങ്ങും റെഗുലര് മോഡലിലേതിന് സമാനമാണ്.
എന്നാൽ, റിയര്വ്യൂ മിറര്, ഡോര് ഹാന്ഡില് എന്നിവയില് കറുപ്പ് നിറം നല്കി. റിപ്പോർട്ട് അനുസരിച്ചു പോളോയില് പ്രവര്ത്തിക്കുന്ന 1.0 ലിറ്റര് മൂന്ന് സിലിണ്ടര് ടര്ബോചാര്ജ്ഡ് ടി.എസ്.ഐ. പെട്രോള് എന്ജിനായിരിക്കും ഈ വാഹനത്തില് നല്കുക. ഈ എന്ജിനില് നല്കിയിട്ടുള്ള ടര്ബോചാര്ജ്ഡ് സ്ട്രാറ്റിഫൈഡ് ഇഞ്ചക്ഷന് (ടി.എസ്.ഐ) സംവിധാനം കൂടുതൽ കരുത്ത് നൽകുന്നു. ഈ 1.0 ലിറ്റര് എന്ജിന് 108 ബി.എച്ച്.പി. പവറും 175 എന്.എം. ടോര്ക്കുമാണ് ഉത്പാദിപ്പിക്കുന്നത്. ആറ് സ്പീഡാണ് ഇതിലെ ട്രാന്സ്മിഷന്.
