ഹീറോ മോട്ടോകോർപിന്റെ ഇരുചക്ര വാഹന ശ്രേണിയിലെ സ്കൂട്ടർ മോഡൽ പ്ലഷർ പ്ലസ്സിൻ്റെ എക്സ്ടെക് പതിപ്പ് വിപണിയിൽ. പുതിയ എൽഇഡി ഹെഡ്ലാമ്പിനൊപ്പം ബ്ലൂടൂത്ത് കണക്റ്റിവിറ്റിയാണ് പ്ലഷർ പ്ലസ് എക്സ്ടെക് പതിപ്പിന്റെ ആകർഷണം. 69,500 രൂപയാണ് പ്ലഷർ പ്ലസ് എക്സ്ടെക് പതിപ്പിന്റെ എക്സ് ഷോറൂം വില. പ്ലഷർ പ്ലസ് LX ( 61,900 രൂപ), VX ( 64,200 രൂപ), ZX ( 66,400 രൂപ) വേരിയന്റുകൾക്ക് മുകളിലാണ് ഹീറോ പ്ലഷർ പ്ലസ് എക്സ്ടെക്കിൻ്റെ സ്ഥാനം.
ഹാൻഡിൽ ബാർ, സീറ്റ് ബാക്ക്റെസ്റ്റ്, റിയർ വ്യൂ മിററുകൾ, എക്സ്ഹോസ്റ്റ് മഫ്ലർ പ്രൊട്ടക്ടർ, ഫെൻഡർ സ്ട്രിപ്പ് എന്നിവിടങ്ങളിൽ ക്രോം ഫിനിഷാണ് പ്ലഷർ പ്ലസ് എക്സ്ടെക് പതിപ്പിന് പ്രീമിയം ലുക്ക് നൽകുന്നത്. പുതിയ എക്സ്ടെക് പ്ലഷർ പ്ലസ് പതിപ്പിന്റെ ഒരു ഹൈലൈറ്റ് എൽഇഡി പ്രൊജക്ടർ ഹെഡ്ലാംപാണ്. 25 ശതമാനം കൂടുതൽ പ്രകാശതീവ്രത നൽകുന്ന ഈ ഹെഡ്ലാംപ് സെഗ്മെന്റിലെ ആദ്യത്തേതാണ് എന്നാണ് ഹീറോ അവകാശപ്പെടുന്നത്. പ്ലഷർ പ്ലസ് എക്സ്ടെക്കിൽ പുറകിലിരിക്കുന്ന വ്യക്തിക്ക് ബാക്ക്റെസ്റ്റ്, ജൂബിലന്റ് യെല്ലോ എന്ന പേരിൽ പുതിയ നിറവും കൂട്ടിച്ചേർത്തിട്ടുണ്ട്.
110 സിസി സിംഗിൾ-സിലിണ്ടർ എൻജിനാണ് ഹീറോ പ്ലഷർ പ്ലസ് എക്സ്ടെക് പതിപ്പിലും ഉള്ളത് . 7000 ആർപിഎമ്മിൽ 8 ബിഎച്ച്പി പവറും 5500 ആർപിഎമ്മിൽ 8.7 എൻഎം പീക്ക് ടോർക്കും എൻജിൻ നിർമിക്കുന്നു. സ്റ്റാർട്ട്-സ്റ്റോപ്പ് സിസ്റ്റം (ഹീറോയുടെ i3S സാങ്കേതികവിദ്യ), സൈഡ്-സ്റ്റാൻഡ് എഞ്ചിൻ കട്ട് ഓഫ് സിസ്റ്റം, മെറ്റൽ ഫ്രണ്ട് ഫെൻഡർ എന്നിവ നൽകിയിരിക്കുന്നു. കോൾ, എസ്എംഎസ് അലേർട്ടുകളുള്ള ബ്ലൂടൂത്ത് കണക്റ്റിവിറ്റിയുള്ള ഡിജി-അനലോഗ് ഇൻസ്ട്രുമെന്റ് ക്ലസ്റ്ററാണ് ഹീറോ പ്ലഷർ പ്ലസ് എക്സ്ടെക്കിലെ മറ്റൊരു പ്രധാന ആകർഷണം.
