‘‘മകന്റെ ചിത്രത്തിനു വേണ്ടിയുള്ള ഹെലികോപ്റ്റര് ചേസ് സീക്വന്സ് ചെയ്യാന് ഞാനും ആര്തറും ഓസ്റ്റിനിലേക്ക് പോകുന്നു’’... ബാബു ആന്റണിയുടെ പുതിയ ഫേസ്ബുക്ക് പോസ്റ്റ് ഇതാണ്. ബാബു ആന്റണിയുടെ മകന് ആര്തര് ആന്റണിയും അച്ഛന്റെ വഴിയേ നടന്ന് സിനിമയിലേക്ക് എത്തുന്നു. ഒരുകാലത്ത് മലയാളസിനിമയിലെ ഏക ആക്ഷന് റോളുകള് ചെയ്തിരുന്ന നടനായിരുന്നു ബാബു ആന്റണി. മലയാളത്തിൽ മാത്രമല്ല തമിഴ്, തെലുങ്കു, കന്നഡ, ഹിന്ദി തുടങ്ങിയ അന്യഭാഷാസിനിമകളിലും അദ്ദേഹം അഭിനയിച്ചിട്ടുണ്ട്. ചെറിയൊരു ഇടവേളയെടുത്ത ശേഷം സ്ഥിരമായി ചെയ്തിരുന്ന ആക്ഷൻ റോളുകളിൽ നിന്നും വ്യത്യസ്തമായ വേഷങ്ങളിലും ബാബു ആന്റണി അഭിനയിച്ചു. ഇപ്പോള് മകന് ആര്തര് ആന്റണിയും സിനിമയിലെത്തിയിരിക്കുകയാണ്.
മൾട്ടിലിംഗ്വൽ ചിത്രം ‘ദ ഗ്രേറ്റ് എസ്കേപ്’ എന്ന ചിത്രത്തിലാണ് മിക്സഡ് മാർഷ്യൽ ആർട്സിൽ ഫസ്റ്റ് ഡാൻ ബ്ലാക്ക് ബെൽറ്റ് കരസ്ഥമാക്കിയ ആർതർ പ്രധാന കഥാപാത്രത്തെ അവതരിപ്പിക്കുന്നത്. സൗത്ത് ഇന്ത്യൻ യു.എസ് ഫിലിംസിന്റെ നിർമാണത്തിൽ ഒരുങ്ങുന്ന ഈ ചിത്രം മലയാളിയായ സന്ദീപ് ജെ.എൽ ആണ് സംവിധാനം ചെയ്യുന്നത്. ആക്ഷൻ ഡ്രാമയായൊരുങ്ങുന്ന ഈ ചിത്രത്തിലേയ്ക്ക് ഓഡീഷനിലൂടെയാണ് ആർതർ തെരഞ്ഞെടുക്കപ്പെട്ടത്. 2013 ൽ ഇടുക്കി ഗോൾഡിൽ ഒരു ചെറിയ കഥാപാത്രത്തെ ആർതർ അവതരിപ്പിച്ചിരുന്നു. 16 കാരനായ ആർതറിനെ തേടി നിരവധി അവസരങ്ങൾ തേടിയെത്തിയിരുന്നുവെങ്കിലും, വിദ്യാഭ്യാസം മുടങ്ങരുത് എന്ന കാരണത്താൽ സിനിമാ പ്രവേശനത്തോട് ബാബു ആന്റണി താത്പര്യക്കുറവ് കാണിച്ചിരുന്നു. യു.എസിൽ ഷൂട്ട് നടക്കുന്നതിനാലും വിദ്യാഭ്യാസത്തിന് തടസങ്ങൾ ഇല്ലാത്തതിനാലുമാണ് ദ ഗ്രേറ്റ് എസ്കേപിൽ മകനെ അഭിനയിപ്പിക്കാൻ ബാബു ആന്റണി തീരുമാനിച്ചത്. മികച്ച കഥാപാത്രങ്ങളും തിരക്കഥയും ലഭിച്ചാൽ ആർതർ നായകനായുള്ള ചിത്രങ്ങളും പ്രതീക്ഷിക്കാമെന്നും ബാബു ആന്റണി പറയുന്നു. ഒപ്പം തന്റെ അടുത്ത സിനിമ ക്രൈം ത്രില്ലറായ 'സാന്താ മരിയ' ആണെന്നും പറഞ്ഞിട്ടുണ്ട്.
