2018ൽ പുറത്തിറങ്ങിയ ആഭാസം എന്ന ചിത്രത്തിന്റെ സംവിധായകനായ ജുബിത് നമ്രടത്തും നടി ദിവ്യ ഗോപിനാഥും വിവാഹിതരായി. ദിവ്യയും ‘ആഭാസ’മെന്ന ചിത്രത്തിൽ ഒരു പ്രധാന കഥാപാത്രത്തെ അവതരിപ്പിച്ചിരുന്നു. അയാൾ ശശി, വൈറസ് തുടങ്ങിയ സിനിമകളിലും ദിവ്യ അഭിനയിച്ചിട്ടുണ്ട്. ലളിതമായ ചടങ്ങുകളോടെ നടന്ന വിവാഹത്തിന്റെ ചിത്രങ്ങള് ഇരുവരും സോഷ്യല് മീഡിയയിലൂടെ പങ്കുവച്ചു. ഒരുമിച്ച് പ്രവര്ത്തിച്ച സിനിമയില് നിന്ന് ആരംഭിച്ച പരിചയവും സൗഹൃദവുമാണ് വിവാഹത്തിലേക്ക് നീണ്ടത്.
"ഡെമോക്രസി ട്രാവല്സ് എന്ന ബസ് യാത്രയില് വച്ച് ആദ്യമായി കണ്ടു പരിചയപ്പെട്ടു, അടുത്തു, സുഹൃത്തുക്കളായി. ഒരുമിച്ച് പ്രവര്ത്തിച്ചും സ്നേഹിച്ചും തര്ക്കിച്ചും വഴക്കിട്ടും കൂടിയും യാത്ര തുടര്ന്നുകൊണ്ടേയിരിക്കുന്നു...’’ വിവാഹ ചിത്രങ്ങള് പങ്കുവച്ചുകൊണ്ട് ദിവ്യ ഇന്സ്റ്റഗ്രാമില് കുറിച്ചു.
തൃശൂര് സ്കൂള് ഓഫ് ഡ്രാമയില് നിന്ന് ബിരുദം നേടിയ ദിവ്യ നാടകങ്ങളില് സജീവമായി പ്രവര്ത്തിച്ചതിനുശേഷമാണ് സിനിമയിലേക്ക് എത്തുന്നത്. രാജീവ് രവി സംവിധാനം ചെയ്ത കമ്മിട്ടിപ്പാടമായിരുന്നു ആദ്യ ചിത്രം. അയാള് ശശി, ഇരട്ടജീവിതം, വൈറസ്, ആഭാസം എന്നിവയാണ് അഭിനയിച്ച മറ്റു സിനിമകള്. അതേസമയം ഹ്രസ്വചിത്രങ്ങളും ഡോക്യുമെന്ററികളും ഒരുക്കി സിനിമാ സംവിധാന രംഗത്തേക്കെത്തിയ ആളാണ് ജുബിത്ത്.
രജിസ്റ്റർ ഓഫീസിൽ ഒപ്പുവച്ച് ലളിതമായ വിവാഹ സത്ക്കാരവും നടത്തി ഇരുവരും ജീവിതത്തിൽ കൈകോർത്തു. വിവാഹചിത്രങ്ങൾ ദിവ്യയും ജുബിത്തും പങ്കുവച്ചിട്ടുണ്ട്. ‘ആഭാസം’ എന്ന സിനിമയുടെ ചിത്രീകരണത്തിനിടെ ദിവ്യ നടൻ അലൻസിയറിന് നേരെ 'മീ ടൂ' ആരോപണം ഉയർത്തിയിരുന്നു. അലൻസിയറിൽ നിന്നും ലൈംഗികാതിക്രമം നേരിട്ടുവെന്ന വെളിപ്പെടുത്തി ദിവ്യ രംഗത്തെത്തിയതിന് പിന്നാലെ നടൻ മാപ്പു പറയുകയും ചെയ്തിരുന്നു.
